युगाण्डामा राष्ट्रपतिकै नेतृत्वमा भ्रष्टाचारविरुद्ध प्रदर्शन
<p>युगाण्डा। युगाण्डाका राष्ट्रपति योवेरी मुसेभेनीले आज भ्रष्टाचारविरुद्धको बृहत् र्‍यालीको नेतृत्व गरेका छन्।</p>
<p>पूर्वी अफ्रिकी मुलुक युगाण्डाको राजधानीमा भ्रष्टाचारविरुद्ध विशाल प्रदर्शन कार्यक्रमको आयोजना गरिएको थियो।</p>
<p>राष्ट्रपति मुसेभेनीले झण्डा फहराउँदै भ्रष्टाचारविरोधी जुलुसमा झण्डै चार किलोमिटर पैदल यात्रा गरेका थिए। </p>
<p>“भ्रष्टाचाररहित युगाण्ड मैबाट शुरू गर्छु” भन्ने मूल नारासहित भ्रष्टाचारविरुद्धको प्रदर्शनको आयोजना गरिएको थियो।</p>
<p>राष्ट्रपति मुसेभेनीले नेतृत्व गरेको प्रदर्शनमा उपराष्ट्रपति इड्वार्ड स्सेकान्दी, सभामुख रेबेका काडागा, प्रधानन्यायाधीश बार्त कातुरीबे, धार्मिक नेताहरू, सरकारी उच्च पदस्थ अधिकारीहरू, आमनागरिकसहित सयौँ सहभागी भएका थिए।</p>
<p>प्रदर्शन कन्सीच्युस्नल स्वायरबाट शुरू भई कोलोलो स्वतन्त्र मैदानमा पुगेको थियो।</p>
<p>प्रदर्शनका कारण कैयौँ घण्टा सडकमा सवारी साधन रोकिएको थियो।</p>
<p>देशको मुख्य समस्याका रूपमा रहेको भ्रष्टाचार न्यूनीकरण गर्ने अभियानलाई प्रभावकारी बनाउने उद्देश्यले प्रदर्शनको आयोजना गरिएको आयोजकहरूले बताएका छन्। </p>
<p>भ्रष्टाचारविरुद्धको अभियानको शुरूआत १० डिसेम्बर २०१८ मा राष्ट्रपति मुसेभेनीले नै गरेका थिए। </p>
<p>अभियानअन्तर्गत सर्वसाधारण र सरकारी अधिकारीहरूलाई भ्रष्टाचार गर्न निरुत्साहित गर्ने विभिन्न कार्यक्रमहरू गरिएको अधिकारीहरूले जनाएका छन्। </p>
<p>उनीहरूका अनुसार यस अवधिमा ५८ हजार ४१५ वटा उजुरी परेका थिए भने ८ हजार २२ वटा उजुरीको सम्बोधन गरिएको छ।</p>
<p>कम्तीमा १११ जनालाई अदालतले दोषी ठहर गर्दै कारबाहीका लागि आदेश दिएको अधिकारीहरूले जनाएका छन्। <em>रासस/सिन्ह्वा</em></p>
प्रतिक्रिया दिनुहोस्
.jpg)
