सावित्राको ह्याट्रिकमा नेपाल फाइनलमा
<p>काठमाडौं। सावित्रा भण्डारीले कीर्तिमानी गोल गर्दै ह्याट्रिक गरेको दिन नेपालले आज माल्दिभ्सलाई ३–० ले हराउँदै १३औं दक्षिण एशियाली खेलकुद (साग)अन्तर्गत महिला फुटबलको फाइनलमा स्थान बनाएको छ।</p>
<p>पोखरा रंगशालामा नेपालको जितमा तीनै गोल सावित्राले गरिन्।</p>
<p>१६औं मिनेटमा सावित्राले नेपाललाई अग्रता दिलाएकी थिइन्।</p>
<p>उक्त गोलसँगै सावित्रा नेपाली फुटबलमा सबभन्दा धेरै गोल गर्ने खेलाडी बनिन्। </p>
<p>उनी ३६ गोल गर्दै पूर्व कप्तान अनु लामाको नाममा रहेको ३५ गोलको कीर्तिमान भंग गरेकी हुन्।</p>
<p>२१औं मिनेटमा नेपालको अग्रता दोब्बर बनाइन्। सावित्राले 'इन्जुरी' समयमा पेनाल्टीमा गोल गर्दै ह्याट्रिक गरिन्।</p>
<p>जितसँगै नेपाल एक खेल अगावै फाइनल पुगेको हो।</p>
<p>राउण्ड रोबिन लिग पद्धतिअनुसार भएको खेलमा नेपालले ६ अंक जोडेको छ।</p>
<p>नेपालले अब लिग चरणको अन्तिम खेल भारतविरुद्ध २१ मंसीरमा खेल्नेछ।</p>
<p>भारतले फाइनलमा स्थान बनाइसकेको छ।</p>
प्रतिक्रिया दिनुहोस्
.jpg)
