सञ्जुले रचिन् इतिहास, भारोत्तोलनमा स्वर्ण
<p>पोखरा। नेपालकी सञ्जु चौधरीले १३ औं दक्षिण एशियाली खेलकुद (साग) अन्तर्गत भारोत्तोलन प्रतियोगितामा स्वर्ण पदक जित्दै इतिहास रचेकी छन्।</p>
<p>महिला ५९ किलाे तौल समूहमा सञ्जुले श्रीलंकाका खेलाडीलाई पछि पार्दै स्वर्ण जित्न सफल भएकी हुन्।</p>
<p>पोखरा-१२, माटेपानीस्थित एसआर केसी बैंक्युटमा आजदेखि शुरू प्रतियोगितामा सञ्जुले स्न्याचमा ७४ र क्लीन एण्ड जर्कमा ९७ सहित १७१ किलाे भार वहन गर्दै राष्ट्रिय कीर्तिमान (स्न्याच, क्लीन एण्ड जर्क तथा टोललतर्फ) का साथ साग भारोत्तोलनमा महिलातर्फ पहिलो स्वर्ण जित्न सफल भएकी हुन्।</p>
<p>प्रतियोगितामा श्रीलंकन खेलाडी आरएमएनएस राजापाक्षाले स्न्याचतर्फ ७० र क्लीन एण्ड जर्कमा ९१ गरी १६१ किलाेका साथ रजत र बंगलादेशकी फायमा अख्तरले स्न्याचमा ७० र क्लीन एण्ड जर्कमा १६० किलाे भार वहन गर्दै कांस्य जितिन्।</p>
<p>चार देशले भाग लिएको विधामा पाकिस्तानको पनि सहभागिता थियो।</p>
<p>गत वर्ष नेपाल पुलिसमा छिरेकी सञ्जुले सागको पहिलो सहभागितामै सिनियरतर्फ स्वर्ण जितेपछि यसको श्रेय प्रशिक्षकसहित घरपरिवारका सदस्यलाई सुम्पिइन्।</p>
<p>उनले आफूलाई निकै खुशी लागेको र सोचेजस्तो लिफ्ट लिन सकेको प्रतिक्रिया दिइन्।</p>
<p>साग भारोत्तोलनमा गत वर्षबाट मात्र नेपालले सहभागिता जनाएको हो।</p>
<p>१०औं संस्करणकाे सागमा नेपालका कमलबहादुर अधिकारीको नाममा पहिलो स्वर्ण छ।</p>
<p>यस्तै महिला ५५ किलाे तौल समूहमा भारतले स्वर्ण जित्यो।</p>
<p>त्यस्तै बंगलादेश र पाकिस्तानले क्रमशः रजत र कांस्य जित्न सफल भए।</p>
<p>भारतकी विन्ध्यारानी देवीले स्न्याचमा ७६ र क्लीन एण्ड जर्कमा १०५ सहित १८१ किलाे भार वहन गर्दै स्वर्ण जितेकी हुन्।</p>
<p>बंगलादेशकी फूलपोटी चक्माले १४८ र पाकिस्तानकी साइमा सहजादले १३५ किलाे भार वहन गरेका हुन्।</p>
<p>बंगलादेशबाट स्न्याचमा ६३ र क्लीन एण्ड जर्कमा ८५ तथा पाकिस्तानकी खेलाडीबाट स्न्याचमा ६१ र क्लीन एण्ड जर्कमा ७४ भार बहन गरिएको थियो।</p>
प्रतिक्रिया दिनुहोस्
.jpg)
