बलात्कार प्रयासका आरोपी पत्रकार सुवेदीविरुद्ध अनुसन्धान गर्न म्याद थप
<p>काठमाडौं। बालिका बलात्कार प्रयासको आरोपमा पक्राउ परेका पत्रकार शिव सुवेदीलाई थप अनुसन्धान गर्न अदालतले दोस्रो पटक म्याद थप गरेको छ।</p>
<p>१९ मंसीरमा रूपन्देही जिल्ला अदालतले सात दिन म्याद थपेको हो। यसअघि उनलाई पाँच दिन म्याद थपिएको थियो।</p>
<p>प्रहरीले अनुसन्धान सकेर सरकारी वकीलको कार्यालयमा प्रतिवेदन बुझाएपछि वकील कार्यालयले मुद्दाको अभियोग पत्र अदालतमा दायर गर्नेछ।</p>
<p>गुल्मीका पत्रकार सुवेदीमाथि १६ वर्षीया बालिकालाई बलात्कार प्रयास गरेको आरोप लागेको छ।</p>
<p>“पीडित बालिकाको जाहेरीपछि हामीले पक्राउ गरेर अनुसन्धान गरिरहेका छौं,” रुपन्देहीका एसपी हेमबहादुर थापाले <em>देखापढी</em>सँग भने ।</p>
<p>९ मंसीरमा पीडित बालिकाले प्रहरी कार्यालयमा जाहेरी दिएकी थिइन्। उनको जाहेरीपछि प्रहरीले पत्रकार सुवेदीलाई पक्राउ गरेको हो।</p>
<p>प्रहरीका अनुसार स्याङ्जा घर भई बुटवल बस्दै आएकी ती बालिका १–३ मंसीरसम्म लुम्बिनीमा सञ्चालित ‘लुम्बिनी न्यूज फेस्टिभल’मा सहभागी हुन साथीसँग पुगेकी थिइन्।</p>
<p>सोही फेस्टिभलमा सहभागी हुन पुगेका सुवेदीले १ मंसीरमा एक होटलमा जबरजस्तीको प्रयास गरेको जाहेरीमा उल्लेख छ।</p>
<p>कक्षा ११ मा अध्ययनरत ती बालिका बुटवलमा आफन्तको घरमा बस्दै आएकी थिइन्।</p>
<p>पीडितले बुटवलकै एक रेडियोमा बाल कार्यक्रम चलाउने गर्थिन्।</p>
<p>लुम्बिनीमा लुम्बिनी न्यूज फेस्टिभल हुन लागेपछि उनकै एक साथीले सहभागी गराउन लगेकी थिइन्।</p>
<p>कार्यक्रममा सहभागी भएर सो दिन उनीहरू एक होटलमा बास बस्न पुगेका थिए। त्यहीँ ती साथीसँगै शिव सुवेदी र उनका साथीसमेत पुगेका थिए।</p>
<p>बालिकालाई जुस भनेर ह्विस्की पिउन लगाएको खुलेको छ। अन्यले बियर सेवन गरेका थिए। त्यसलगत्तै त्यहाँबाट पीडित बालिकाकी साथी र अर्को व्यक्ति केहीबेरमा आउने भन्दै बाहिर निस्केका थिए।</p>
<p>अरू कोही नभएको मौका छोपेर आरोपित सुवेदीले आफूलाई जबरजस्ती करणी प्रयास गरेको ती बालिकाले जाहेरीमा उल्लेख गरेकी छन्।</p>
<p>उक्त घटना लुकाउन उल्टै बालिकालाई धम्की दिइएको समेत खुलेको छ। परिवारलाई घटनाका बारेमा सुनाएपछि पीडितले ९ मंसीरमा प्रहरीमा जाहेरी दिएकी हुन्।</p>
प्रतिक्रिया दिनुहोस्
.jpg)
