अटो पल्टिँदा चितवनमा पाँचजनाको मृत्यु
<p>चितवन। राप्ती नगरपालिका–५ मा आज साँझ अटो दुर्घटना हुँदा पाँचजनाको मृत्यु भएको छ भने एक घाइते भएका छन्।</p>
<p>जिल्ला प्रहरी कार्यालय चितवनले दिएको जानकारीअनुसार सो नगरपालिका–४, चेपाङमार्गबाट भण्डारातर्फ आउँदै गरेको ना१ह ६४०९ नम्बरको अटो राप्ती–५, डुम्रेखाडी पुल नजिक अनियन्त्रित भई पल्टिएको थियो।</p>
<p>अटो पल्टिँदा अटोमा सवार पाँचको मृत्यु भएको जिल्ला प्रहरी कार्यालय चितवनका प्रवक्ता एकनारायण कोइरालाले जानकारी दिए। </p>
<p>मृत्यु हुनेमा पर्वतको कुश्मा नगरपालिकाको पिपलटारीका ३५ वर्षीय श्यामप्रसाद तिवारी रहेका छन् अन्यको भने नाम र ठेगाना खुल्न सकेको छैन।</p>
<p>एक २६ वर्षीय पुरुषको पुरानो मेडिकल कलेजमा उपचार भइरहेको छ। उनको अवस्था गम्भीर रहेको प्रहरीले जनाएको छ।</p>
<p>घाइते भई उपचारका लागि ल्याइएकामध्ये तीनजनाको पुरानो मेडिकल कलेजमा र अन्य दुईजनाको भरतपुर अस्पतालमा उपचारका क्रममा मृत्यु भएको प्रहरीकाे भनाइ छ। <em>रासस</em></p>
प्रतिक्रिया दिनुहोस्
.jpg)
