चीन–अमेरिका व्यापार खुम्चियो
<p>बेइजिङ। संयुक्तराज्य अमेरिकासँग यस वर्षको नोभेम्बरमा चीनको व्यापारमा कमी आएको छ। चीन र अमेरिकाबीच जारी व्यापार युद्धकै कारण दुई देशबीचको व्यापारमा मन्दी आएको विश्लेषकहरूले बताएका छन्।</p>
<p>अघिल्लो वर्षको तुलनामा नोभेम्बरमा चीनबाट संयुक्तराज्य अमेरिकातर्फको व्यापारमा २३ प्रतिशतले कमी आई ३५ अर्ब ६० करोड अमेरिकी डलरमा सीमित भएको छ।</p>
<p>चिनियाँ भन्सार विभागका अनुसार अमेरिकाबाट हुने आयातमा पनि २.८ प्रतिशतले कमी आएको छ। अमेरिकाबाट चीनतर्फ करिब ११ अर्ब डलर बराबरको मालवस्तु आयात भएको छ।</p>
<p>तर, चीनबाट फ्रान्सतर्फ भएको निकासीमा भने सुधार आएको छ जसका कारण चीनको कूल व्यापार घाटामा कमी आएको छैन।</p>
<p>विश्वव्यापीरूपमै मागमा कमी आए पनि अघिल्लो वर्षको तुलनामा निकासीतर्फ १.१ प्रतिशत वृद्धि भई करीब २२२ अर्ब अमेरिकी डलर पुगेको छ।</p>
<p>आयातमा भने ०.३ प्रतिशत वृद्धि भएको छ। चीनले यस अवधिमा १८३ अर्ब अमेरिकी डलर बराबरको वस्तु तथा सेवा खरिद गरेको छ।</p>
<p>संयुक्तराज्य अमेरिका र चीनबीच व्यापार वार्ता जारी रहे पनि ठोस सहमति अझै हुन सकेको छैन। अमेरिकी प्रविधि जबर्जस्ती चीनले हत्याएको आरोप लगाउँदै वर्तमान ट्रम्प प्रशासनले चीनमाथि व्यापार युद्ध नै शुरू गरेको छ।</p>
<p>दुवै देशले एकअर्काका सामानमा २५ प्रतिशतसम्म करवृद्धि गरेपछि विश्वव्यापी आर्थिक मन्दीको सम्भावना बढेको छ। <em>रासस/एपी</em></p>
<p> </p>
प्रतिक्रिया दिनुहोस्
.jpg)
