शालीग्राम संग्रहालयले विश्वको ध्यान तान्छ: देउवा
<p>बागलुङ। नेपाली कांग्रेसका सभापति शेरबहादुर देउवाले कालीगण्डकी नदीमा मात्र पाइने दुर्लभ एवम् बहुमूल्य शिला सङ्कलन गरी बनाइएको शालीग्राम संग्रहालयले विश्वको ध्यान तान्ने विश्वास व्यक्त गरेका छन्।</p>
<p>बागलुङ नगरपालिका–४, कुँडुलेस्थित श्रीरङ्गवेङ्कटेश मुक्तिनारायण मन्दिर परिसरमा भूमिगत ‘स्वामी श्रीधराचार्य शालीग्राम संग्रहालय’ को आज उद्घाटन गदै उनले अलौकिक शिला जम्मा गरी निर्माण थालिएको संग्रहालयले विश्वका धार्मिक पर्यटक आकर्षण गर्ने र लोप हुने अवस्थामा रहेका शालीग्रामको संरक्षण विश्वमै उदाहरणीय कार्य भएको बताए। </p>
<p>उनले सवालाख शालीग्राम एकै साथ दर्शन गर्न मिल्ने संरचना अन्त कतै नभएको दाबीसमेत गरे।</p>
<p>६ करोड रूपैयाँ लागतमा डेढ वर्ष लगाएर संग्रहालय बनाइएको हो। शालीग्राम संरक्षणसँगै पर्यटन प्रवर्द्धनको उद्देश्यले सग्रहालय निर्माण गरिएको मन्दिरका अध्यक्ष स्वामी ऋषि प्रपन्नाचार्यले बताए। </p>
<p>सग्रहालयमा सवा लाख शालीग्राम, गण्डकी सभ्यताको प्रतिरूप, धार्मिक पुस्तकालय, ध्यानस्थल र वृत्तचित्र प्रदर्शनीकक्ष बनाइएको छ। एक सय मिटर लामो सुरुङको प्रवेशद्वार नजिकै कृत्रिम भू-बनोटमा दामोदरकुण्डदेखि त्रिवेणीसम्मका धार्मिक तथा सांस्कृतिक सम्पदाको नमूना देखाइएको छ।</p>
<p>सग्रहालयभित्र मुक्तिनाथ, मन्दिर, देवस्थल, हिमाल, नदीसँगै अन्य भौतिक संरचना निर्मित छन्। मुस्ताङमा पर्ने दामोदरकुण्ड कालीगण्डकी नदीको उद्‍गमस्थललाई समेत सङ्ग्रहालयमा सजाइएको छ।</p>
<p>शालीग्राम र गण्डकी सभ्यता देखाउने नक्शाङ्कनलाई सिसाभित्र सजाइएको छ। सुरुङको दायाँपट्टि ११२ मानिस अट्ने वृत्तचित्र प्रदर्शनीकक्ष निर्माण गरिएको छ। त्यहाँ गण्डकी सभ्यताको महिमा झल्काउने र गण्डकी सभ्यतामाथि पछिल्लो समय भइरहेको अतिक्रमण देखाउने वृत्तचित्र प्रदर्शन गरिनेछ।</p>
<p>सग्रहालय अवलाेकन गरेकाे १०० रुपैयाँ शुल्क तोकिएको छ। विद्यार्थीले ५० रुपैयाँको टिकटमा संग्रहालय घुम्न पाउनेछन् । उद्घाटनपछि औपचारिकरूपमा सर्वसाधारणका लागि सङ्ग्रहालय खुला गरिएको छ। <em>रासस</em></p>
प्रतिक्रिया दिनुहोस्
.jpg)
