उपनिर्वाचनको समीक्षा र स्थायी समिति बैठकबारे छलफल गर्न नेकपा सचिवालय बैठक बस्दै
<p>काठमाडौं। सत्तारुढ नेपाल कम्युनिष्ट पार्टी (नेकपा) को सचिवालय बैठक आज दिउँसो १ बजे बस्दैछ। </p>
<p>सचिवालयको बैठक धुम्बाराहीस्थित पार्टी केन्द्रीय कार्यालयमा बस्नेछ।</p>
<p>आजको बैठकमा उपनिर्वाचनको समीक्षा, पार्टी एकताको बाँकी विषयको छलफल हुने नेकपाका नेता माधवकुमार नेपालले <em>देखापढी</em>लाई बताए।</p>
<p>"स्थायी समिति र केन्द्रीय कमिटी बैठक बोलाउनेबारे पनि बैठकमा छलफल हुन्छ," नेपालले भने। </p>
<p>तत्कालीन नेकपा एमाले र माओवादी केन्द्रबीच एकतापछि बनेको नेकपाको लामो समयदेखि स्थायी समिति र केन्द्रीय समितिको बैठक बसेको छैन।</p>
<p>एकता घोषणाकै दिन ३ जेठ २०७५ मा केन्द्रीय समितिको बैठक बसेको थियो भने २९ मंसीर २०७५ मा स्थायी समिति बैठक बसेको थियो।</p>
<p>त्यसयता केन्द्रीय समिति र स्थायी समितिको बैठक बसेको छैन। </p>
<p>नेकपा अध्यक्ष पुष्पकमल दाहालले बैठकको तयारीस्वरूप २२ मंसीरमा माधवकुमार नेपाल र महासचिव विष्णु पौडेललगायतसँग छलफल गरेका थिए।</p>
<p>दाहालले नेकपाका अर्का अध्यक्ष प्रधानमन्त्री केपी शर्मा ओलीसँग पनि बैठकको अजेण्डाबारे परामर्श गरेका थिए। </p>
<p>यसअघि १८ मंसीरमा बसेको सचिवालय बैठकले १४ मंसीरमा भएको प्रतिनिधि सभा, प्रदेश सभा र स्थानीय तह उपनिर्वाचनबारे सम्बन्धित कमिटीलाई २२ मंसीरभित्र समीक्षात्मक प्रतिवेदन पठाउन निर्देशन गरेको थियो।</p>
<p>आजको बैठकको अध्यक्षता नेकपाका अध्यक्ष पुष्पकमल दाहालले गर्नेछन्। </p>
<p>एपेन्डिसाइटिसको शल्यक्रियापश्चात आराम गरिरहेका प्रधानमन्त्री ओली सचिवालय बैठकमा उपस्थित नहुने बताइएको छ।<br />
</p>
प्रतिक्रिया दिनुहोस्
.jpg)
