दक्षिण सुडानका सभामुखद्वारा राजीनामा
<p>सुडान। सांसदहरूको अत्यधिक दबाब र चेतावनीपछि दक्षिणी सुडानका सभामुखले पदबाट राजीनामा दिएका छन्।</p>
<p>कार्यकुशलता प्रदर्शन गर्न नसकेको र भ्रष्टाचारविरुद्धको लडाइँमा अवरोधक भएको आरोप लगाउँदै राजीनामा गर्न सांसदहरूले दबाब दिएका हुन्। </p>
<p>स्थानीय सञ्चारमाध्यमहरूले आज सम्प्रेषण गरेको समाचारअनुसार सभामुख एन्थोनी लिनो माकानालाई महालेखा परीक्षक र भ्रष्टाचारविरुद्धका प्रतिवेदनहरूलाई संसदमा छलफल गर्न नदिइएको भन्दै राजीनामा गर्न दबाब दिइएको हो।</p>
<p>उनलाई अफ्रेक्षिम बैंकबाट अनाधिकृतरूपमा करोडौँ रुपैयाँ गलत तरिकाले लिएको आरोप पनि लगाइएको छ।</p>
<p>सांसदहरुले माकानाका विरुद्धमा संकलन गरेको दस्तावेजहरू समेत संसदमा पेश गरेपछि उनले राजीनामा दिनु परेको हो।</p>
<p>“मैले सत्तारुढ दल एसपीएलएम पार्टीको नेतृत्वको आग्रहअनुसार राजीनामा दिएको हुँ,” दक्षिण सुडान रेडियोलाई आज दिएको अन्तर्वार्ताका क्रममा उनले भने। </p>
<p>दक्षिणी सुडानमा भ्रष्टाचार अनियन्त्रित भएको बताउने गरिएको छ।</p>
<p>सन् २०११ मा स्वतन्त्र भएको दक्षिण सुडान दुई वर्ष अगाडिदेखि गृह युद्धमा फसेको छ। <em>रासस/एएफपी</em></p>
प्रतिक्रिया दिनुहोस्
.jpg)
