Others

गृहपृष्ठ

पाकिस्तानमा खोप अभियान शुरु, चिनियाँ सिनोफार्मको खोप लगाइने इस्लामाबाद। पाकिस्तानमा कोभिड-१९ विरुद्ध बुधबारदेखि पहिलो चरणको खोप अभियान शुरु हुँदै छ। पहिलो चरणमा स्वास्थ्यकर्मीलाई उक्त खोप दिइने पाकिस्तान सरकारको तयारी छ। यो खोप चीन सरकारले उपलब्ध गराएको हो। चीनले सिनोफार्म फर्मास्युटिकल्सबाट उत्पादित पाँच लाख डोज खोप सहयोग गरेको थियो। यसै महिनाको अन्त्यसम्ममा अरू लाखौं डोज खोप पाकिस्तान ल्याउने र आम जनतालाई खोप लगाउने पाकिस्तान सरकारको योजना छ।  सिनोफार्म खोपलाई चिनियाँ स्वास्थ्य अधिकारीहरूले आपतकालीन प्रयोगका लागि अनुमति दिइसकेका छन्। करिब २२ करोड जनसङ्ख्या रहेको पाकिस्तानमा पाँच लाख मानिसमा कोरोना सङ्क्रमण देखिएको र तीमध्ये ११ हजारको मृत्यु भएको छ। तर सीमित सङ्ख्यामा मात्र परीक्षण गरिएकाले सङ्क्रमित व्यक्ति र मृत्युको सङ्ख्या बढी हुन सक्ने अनुमान गरिएको छ। सिनोफार्मको खोपको प्रभावकारिताका विषयमा केही विज्ञहरूले प्रश्न उठाए पनि पाकिस्तान सरकारले सिनोफार्मको खोपलाई अनुमति दिइसकेको छ। अस्ट्राजेनिकाले उत्पादन गरेको खोप पनि करिब एक करोड ७० लाख डोज कोभाक्समार्फत् सन् २०२१ को पहिलो छ महिनाभित्र प्राप्त हुने पाकिस्तान सरकारले विश्वास लिएको छ। भारतले छिमेकी मुलुकहरूलाई केही खोप अनुदानमा दिइरहे पनि त्यो सूचीमा पाकिस्तान रहेको छैन। रासस/एएफपी