बालुवाटारको जग्गा किन्नेविरुद्ध पनि मुद्दा चलाउने अख्तियारको तयारी
<p>काठमाडौं। बालुवाटारको २१४ रोपनी सरकारी जग्गा व्यक्तिको नाममा बनाउने योजनाकारहरू मात्र होइन, जग्गा किन्नेहरूविरुद्ध पनि मुद्दा चल्ने भएको छ।</p>
<p>अख्तियार दुरुपयोग अनुसन्धान आयोग र प्रहरीको केन्द्रीय अनुसन्धान ब्यूरो (सीआइबी) ले सरकारी जग्गा किनबेच गर्ने दुवै पक्षलाई मुद्दा लगाउने निष्कर्ष निकालेको आजको नयाँ पत्रिकामा समाचार छापिएको छ। </p>
<p>“जग्गाधनीलाई पनि मुद्दा चल्छ”, अनुसन्धान टीममा रहेका अख्तियारका एक अधिकारी भन्छन्, “तर, कुन तह र कुन हदसम्म बारबाही हुने भन्ने निक्र्यौल हुन बाँकी छ।”</p>
<p>राणा परिवार र उनीहरूसँग जग्गा किन्ने दुई तहसम्मलाई मुद्दा चल्ने सम्भावना रहेको उनले बताए। </p>
<p>प्रधानमन्त्री निवाससँगै जोडिएको ललिता निवासको जग्गा हाल सयभन्दा धेरै व्यक्तिको नाममा छ।</p>
<p>अख्तियारले ती सबै जग्गाधनीसँग बयान सकेर मुद्दा चलाउने प्रक्रिया अघि बढाइसकेको छ। </p>
<p>मुख्य योजनाकार शोभाकान्त ढकाल र रामप्रसाद सुवेददीले नै विभिन्न व्यक्तिलाई बिक्री गरेका हुन्।</p>
<p>भाटभटेनी सुपरमार्केटले सोही जग्गामा गोदाम बनाएको छ। </p>
<p>सरकारी जग्गा कसरी व्यक्तिको नाममा गयो भनेर थप छानबीन गर्ने जिम्मेवारी सरकारले सीआइबीलाई दिएको थियो। </p>
<p>“केही ल्याब रिपोर्ट आउन बाँकी छ, एक-दुईजनासँग थप बुझ्नुपर्नेछ”, ब्यूरोका निर्देशक डीआइजी नीरज शाही भन्छन्, “अब छिट्टै प्रतिवेदन बुझाउँछौँ।”</p>
<p>नक्कली मोही खडा गरी सरकारी जग्गा कब्जा गरिएको आशंकामा सीआइबीले मोही भनिएका व्यक्तिको औँठाछाप परीक्षण गरिरहेको छ। </p>
प्रतिक्रिया दिनुहोस्
.jpg)
