चितवनमा उम्मेदवारले खर्च विवरण बुझाएनन्
<p>चितवन। स्थानीय तहको निर्वाचन सम्पन्न भएको दुई वर्ष बितिसक्दा पनि जिल्लाका स्थानीय तहका उम्मेदवारले खर्चको विवरण बुझाएका छैनन्।</p>
<p>जिल्लाका सात स्थानीय तहका ९१७ जनाले निर्वाचन कार्यालयमा खर्चको विवरण नबुझाएका हुन्।</p>
<p>जिल्ला निर्वाचन अधिकारी हरि ढकालका अनुसार जिल्लाका सात स्थानीय तहमा दुई हजार २०३ उम्मेदवार थिए। तीमध्ये एक हजार २८६ जनाले मात्र खर्चको विवरण बुझाएको उनले जानकारी दिए।</p>
<p>यस्तै प्रतिनिधिसभा र प्रदेशसभाका १२/१२ जनाले पनि खर्च विवरण नबुझाएको कार्यालयले जनाएको छ। साना राजनीतिक दलका र स्वतन्त्र उम्मेदवारले खर्चको विवरण नबुझाएका हुन्।</p>
<p>उनीहरूलाई कार्यालयले ताकेता गरिरहेको भए पनि विवरण बुझाइनसकेको ढकालले बताए। निर्वाचन सम्पन्न भएको ३० दिनभित्र उम्मेदवारले खर्च विवरण बुझाउनुपर्ने हुन्छ।</p>
<p><strong>सातजनाको धरौटी जफत</strong></p>
<p>उप-निर्वाचनमा जिल्लाका तीन वडाध्यक्षका लागि उम्मेदवार बनेका सात उम्मेदवारको धरौटी जफत भएको छ। भरतपुर महानगरपालिका-१६, खैरहनी नगरपालिका-४ र ५ मा १३ जना उम्मेदवार थिए।</p>
<p>तीमध्ये सातजनाले सदर मतको १० प्रतिशत मत ल्याउन नसकेपछि धरौटी जफत भएको हो। तीनवटै वडामा नेपाली कांग्रेसले विजय हासिल गरेको छ।</p>
प्रतिक्रिया दिनुहोस्
.jpg)
