Others

गृहपृष्ठ

बैंक ह्याकर पीटरको अर्को धन्दाः चिठ्ठा परेको भन्दै सामाजिक सञ्जालबाट करोडौं ठगी काठमाडौं। असोज पहिलो साता महानगरीय अपराध महाशाखाले कृषि विकास बैंक लहान शाखाका कर्मचारीकै ‘युजर आइडी’ प्रयोग गरेर ४ करोड ६३ लाख रूपैयाँ ‘ट्रान्सफर’ भएको पत्ता लगायो। यो प्रकरणमा संलग्न १२ जनाभन्दा बढी मानिस प्रहरीले पक्राउ गर्&zwj;यो। पक्राउ परेकाहरूबाट मुख्य योजनाकार नाइजेरियन नागरिक ‘पीटर हर्मन एसेन्गा’ रहेको खुल्यो।  यी योजनाकारले करीब ५ अर्ब रूपैयाँ लुट्न खोजेको प्रहरीले अनुसन्धानका क्रममा पत्ता लगायो। समयमै एजेन्ट पक्राउ गरेपछि प्रहरीले नेपाली बैंकको ठूलो रकम लुटिनबाट जोगायो।  दुई साताअघि एक महिला आफू ठगिएको भन्दै महानगरीय अपराध महाशाखा पुगिन्। ठूलो चिठ्ठा परेको भन्दै विदेशबाटै ‘स्मिथ मोरिस’ नाम गरेका व्यक्तिले फोन गरेर जानकारी दिएको र उक्त रकम पाउन आवश्यक केही ‘ट्याक्स’ तिनुपर्ने बताइएको उनले प्रहरीलाई भनेकी छन्। त्यसरी रकम जम्मा गर्न भनिएपछि उनले ‘स्मिथ मोरिस’ले जिम्मा दिएका नेपालीको बैंक खातामा सात लाख ४० हजार रूपैयाँ जम्मा गरिन्। “यो जानकारीपछि हामीले उनले रकम जम्मा गरिदिएको व्यक्तिको खोजी गर्&zwj;याै&zwnj;ं,” महानगरीय अपराध महाशाखाका प्रहरी वरिष्ठ उपरीक्षक (एसएसपी), सहकुल थापाले भने, “रकम जम्मा गरिएका खातावाल व्यक्ति दोलखा फुलपाका ५२ वर्षीय रमेश खड्कालाई पक्राउ गरेर अनुसन्धान थाल्यौं।” उनीसहित नवलपरासी रामग्राम नगरपालिका–१७ का विश्वेश्वरप्रसाद तिवारी र सोही ठाउँका १९ वर्षीय संदीप कलवार पक्राउ परे। तीनजना पक्राउ परेपछि अनलाइन ठगीका योजनाकार पीटर हर्मन एसेन्गा रहेको खुलासा भयो। एसेन्गाले नेतृत्व गरेको गिरोहले यसअघि बैंकिङ प्रणाली ह्याक गरेर ठूलो रकम चोरी गरेको थियो।  त्यसरी बैंकिङ प्रणाली ह्याक गरेको गिरोह र अहिले चिठ्ठाका नाममा ठगी गर्नेहरूबीच सिधा सम्बन्ध देखिएको प्रहरीले जनाएको छ। यही समूहले फेसबुक, भाइबर, ईमो, ह्वाट्सएपलगायत सोसल मिडिया र अनलाइनका माध्यमबाट ठगी धन्दा गर्दै आएको अनुसन्धानबाट खुलेको एसएसपी थापाले बताए।  पक्राउ परेकाहरूले हालसम्म १४ करोड ६७ लाख ९१ हजार रूपैयाँ शंकास्पद कारोबार गरेको देखिएको छ। उक्त रकम तिनै नाइजेरियन नागरिक पीटर र बेलायती नागरिक स्मिथ मोरिसससम्म पुगेको देखिएपछि बैंकिङ ह्याकिङ र अनलाइन ठगी दुवैमा उनीहरूकै योजना रहेको खुलासा भएको हो।  <img alt="" height="651" src="https://www.dekhapadhi.com/storage/photos/shares/Crime/pakrau_bank hacking.jpg" width="960" /> प्रहरीका अनुसार अहिलेसम्म ३४ जना नेपाली अनलाइन ठगीको शिकार भएका छन्।  बैंक ह्याक र ठगी गरेको रकमबाट १५ देखि २० प्रतिशत कमिसन दिएर काम लगाउने गरिएको र बाँकी रकम विभिन्न माध्यमबाट भारत पठाउने गरेको अनुसन्धानबाट खुलेको छ। “अनलाइन ठगीमा नेपालका एजेन्टहरूको सिधै सम्पर्क पीटर र स्मिथसँग देखिएको छ,” एसएसपी थापाले भने, “कारोबार भएको रकम ठगिएको हो वा अन्य बैंकमा पनि ह्याकिङ गरिएको हो भन्ने अनुसन्धानबाट खुल्नेछ।” १६ बैंकको खाता प्रयोग अनलाइन ठगी प्रकरणमा पक्राउ परेका तीनजनाले नेपालका विभिन्न १६ वटा बैंकको खाता प्रयोग गरेको अनुसन्धानबाट खुलेको छ। बैंक अफ काठमाडौं, प्रभु बैंक, मेगा बैंक, हिमालयन बैंक, सनराईज बैंक, सिटिजन बैंक, नबिल बैंक, लुम्बिनी विकास बैंक, माछापुच्छ्रे, एसबीआई, नेपाल बंगलादेश, ग्लोबल आईएमई, एनआईसी एशिया, स्टाण्डर्ड चार्टड, एनएमबी, सिद्धार्थ र लक्ष्मी बैंकलगायतको खाता प्रयोग भएको प्रहरीले जनाएको छ। यी बैंकहरूमासमेत ह्याक भएको हुनसक्ने भन्दै प्रहरीले त्यसको पनि अनुसन्धान भइरहेको बताएको छ। कृषि विकास बैंक र पानश रेमिटमा ह्याक गरिएको भने यसअघि नै पुष्टि भइसकेको छ। ४० नेपाली र १० भारतीय एजेन्ट करोडौं रकम चिठ्ठा परेको भन्दै प्रलोभन देखाएर अनलाइनमार्फत् रकम ठग्ने गिरोहले यसका लागि ४० जना नेपाली र १० जना भारतीय नागरिकलाई प्रयोग गरेको पाइएको छ।  “चिठ्ठामा परेको रकम पाउन अग्रिम रूपमा निश्चित रकम करस्वरूप पठाइदिनुपर्ने भन्ने कुराकानी घटनाका योजनाकार र केही भारतीय नागरिकबीच भइरहेको देखिन्छ,” एसएसपी थापाले भने, “४० जना नेपाली एजेन्टको पहिचान भइसकेको छ। भारतीय एजेन्टको भने यकीन हुन सकेको छैन।”  अहिलेसम्म अनलाइनमार्फत् ठगिएका १५ जना व्यक्ति प्रहरीको सम्पर्कमा पुगेका छन्। प्रहरीले अनलाइनमार्फत् ठगिएको भए सम्पर्कमा आउन अनुरोध गरेको छ। ‘पीटर छिट्टै पक्राउ पर्छन्’ विदेशमा बसेर नेपालमा बैंक ह्याक गरेर रकम लुट्ने तथा करोडौं चिठ्ठा परेको भन्दै अनलाइनमार्फत् ठगी गर्ने गिरोहका मुख्य योजनाकार नाइजेरियन नागरिक ‘पीटर हर्मन एसेन्गा’लाई प्रहरीले पक्राउ गर्ने प्रक्रिया अघि बढाएको छ। “हामीले ढिलोचाँडो पक्राउ गर्छौं, सबै प्रक्रिया अघि बढाइसकेका छौं,” एसएसपी थापाले भने। प्रहरीले पीटरको वास्तविक नाम, उनी बसेको स्थान र तस्वीरसमेत पत्ता लगाइसकेको छ। यसअघि भारतको मुम्बईबाट धन्दा चलाउने उनले भारतकै दिल्ली तथा पाकिस्तान, चीन, तान्जानिया र इथोपियामा पनि आफ्नो ‘बेस’ बनाएको खुलेको छ।  पीटर र खड्काको कनेक्सन ५२ वर्षीय रमेश खड्का दोलखाको फुलपा–२ का स्थायी बासिन्दा हुन्। उनले लामो समयदेखि काठमाडौंको ठमेलमा होटल व्यवसाय गर्दै आएका थिए। लजसहितको होटल चलाउने उनले अहिले पनि ठमेल भान्साघर सञ्चालन गरिरहेका छन्।  सन् २०१० मा पीटर नेपाल आएका थिए। यहाँ आउँदा उनी खड्काकै होटलमा बस्थे। त्यसरी खड्कासँग हिमचिम बढाएका उनी पछिल्लो समय कहिले नेपाल आए भन्ने खुलेको छैन। “पहिलेदेखि नै चिनजान र राम्रो सम्बन्ध रहेको अनुसन्धानबाट खुलेको छ,” एसएसपी थापाले भने, “त्यसपछि नै पीटरले नेपालमा खड्कालाई एजेन्टका रूपमा प्रयोग गरेको देखिन्छ।”  पक्राउ परेका विश्वेश्वरप्रसाद तिवारी खड्काकै होटलका कामदार हुन्। सन्दीप कलवार भने विदेशी मुद्रा सटही गर्ने व्यवसायमा संलग्न थिए।