सुत्केरी अस्पतालमै 'बन्धक'
<p>राजविराज। उपचारबापतको तीन लाख ५० हजार रूपैयाँ बुझाउन नसक्दा सप्तरीको तिलाठी कोइलाडी गाउँपालिका–८ तोपाकी ललितादेवी खंगले विराटनगरस्थित विराटनगर अस्पतालबाट डिस्चार्ज हुन पाएकी छैनन्। </p>
<p>एकमहीने सुत्केरी ललिताका पति गोपीकुमारले रकम जोहो गर्न आफ्नो गाउँ र सदरमुकाममा माग्न थालेका छन्। </p>
<p>विराटनगरस्थित जनरल हस्पिटल एन्ड ट्रमा केयर सेन्टरमा दुई छोरी जन्माएपछि ललितालाई विराटनगर अस्पताल पुर्‍याइएको थियो।</p>
<p>नवजात जुम्ल्याहामध्ये एकको मृत्यु भइसकेको छ भने अर्की शिशु तोपास्थित घरमा छिन्। </p>
<p>ललिता खत्वे समुदायकी हुन्। उनका पति गोपी मजदूरी गरेर जीविकोपार्जन गर्छन्। </p>
<p>ललिताका पति गोपीले ट्रमा सेन्टरमा सुत्केरी गराउनदेखि छोरीको उपचार खर्चसमेत गरी एक लाख ७४ हजार रूपैयाँ ब्झाएको बताए। ३२ हजार ७५० औषधीबापत खर्च भएको थियो।</p>
<p>विराटनगर अस्पतालमा रहेकी ललिता निको भइसकेकी छन्। तर, डिस्चार्ज हुन अस्पतालमा उपचारमा लागेको तीन लाख ५० हजार रूपैयाँ बुझाउनुपर्ने आजको कान्तिपुरमा समाचार छ। </p>
<p>“बील तिर्न नसक्दा अस्पताल प्रशासनले आउन दिएको छैन”, गोपीले भने, “ऋण गरेर ट्रमा सेन्टरमा दुई लाखभन्दा बढी बुझाइसकेँ, अब साढे तीन लाख कसरी जुटाऊँ।”</p>
प्रतिक्रिया दिनुहोस्
.jpg)
