रुपन्देहीमा बलात्कार प्रयास प्रकरणः थप दुईजनाविरुद्ध पक्राउ पुर्जी
<p>काठमाडौं। मंसीर पहिलो साता लुम्बिनीमा एक बालिकामाथि भएको बलात्कार प्रयास घटनामा थप दुईजना पत्रकारलाई पक्राउ गर्न अदालतले अनुमति दिएको छ।</p>
<p>रुपन्देही जिल्ला अदालतबाट अनुमति पाएपछि प्रहरीले गुल्मीकी रिया बस्नेत र प्रकाश न्यौपानेलाई पक्राउ गर्ने तयारी गरेको हो।</p>
<p>बलात्कार प्रयास गरेको जाहेरीपछि यसअघि नै पत्रकार शिव सुवेदी पक्राउ परिसकेका छन्। उनलाई प्रहरीले अदालतबाट दुईपटक म्याद थप गरेर अनुसन्धान गरिरहेको छ।</p>
<p>उक्त प्रकरणमा अन्य दुईजना पत्रकारको समेत संलग्नता रहेको खुल्न आएपछि अनुसन्धानका लागि प्रहरीले पक्राउ अनुमति लिएको हो। जिल्ला प्रहरी कार्यालय रुपन्देहीका प्रहरी प्रवक्ता डीएसपी खडकबहादुर खत्रीले उनीहरूको खोजी भइरहेको बताए।</p>
<p>बुटबलको एक स्थानीय एफएममा कार्यरत १६ वर्षीया बालिकामाथि अर्घाखाँची घर भई गुल्मी बस्दै आएका शिव सुवेदीले बलात्कारको प्रयास गरेको आरोप छ।</p>
<p>लुम्बिनीमा सञ्चालित ‘लुम्बिनी न्यूज फेस्टिभल’मा सहभागी हुन ती बालिका रियासँग पुगेकी थिइन्। सोही फेस्टिभलमा सहभागी हुन पुगेका सुवेदीले १ मंसीरमा एक होटलमा जबरजस्तीको प्रयास गरेको जाहेरीमा उल्लेख छ।</p>
<p>कक्षा ११ मा अध्ययनरत ती बालिका बुटवलमा आफन्तको घरमा बस्दै आएकी थिइन्। कार्यक्रममा सहभागी भएर सो दिन उनीहरू एक होटलमा बास बस्न पुगेका थिए। त्यहीँ रियासँगै शिव सुवेदी र उनका साथी प्रकाशसमेत पुगेका थिए।</p>
<p>अनुसन्धान सकेर सरकारी वकीलको कार्यालयमा प्रतिवेदन बुझाउने प्रहरीले तयारी गरिरहेको छ।</p>
प्रतिक्रिया दिनुहोस्
.jpg)
