वामदेव गौतमलाई तीन अधिकार प्रस्ताव
<p>काठमाडौं। नेपाल कम्युनिष्ट पार्टी (नेकपा) का नेता वामदेव गौतमलाई मुख्य तीन अधिकारको व्यवस्थासहित उपाध्यक्ष बनाउने गरी केन्द्रीय सचिवालयले स्थायी समितिमा विधान संशोधन प्रस्ताव लैजाने भएको छ। </p>
<p>एक वर्षपछि २९ मंसीरमा बोलाइएको स्थायी समिति बैठकमा केन्द्रीय सचिवालयले प्रस्तावित उपाध्यक्षका तीन अधिकार हुने गरी विधान संशोधनको प्रस्ताव लैजाने गरी प्रस्ताव तयार पारेको हो। </p>
<p>पार्टी कार्यालय धुम्बाराहीमा २३ मंसीरमा बसेको सचिवालय बैठकले गौतमलाई उपाध्यक्ष बनाउने र विधानको प्रस्तावनाको केही नीतिगत अस्पष्टता सच्याउन विधान संशोधन गर्ने निर्णय गरेको समाचार आजको नयाँ पत्रिका दैनिकमा छापिएको छ।</p>
<p>स्थायी समितिको तयारीको लागि आज अध्यक्ष पुष्पकमल दाहालले सचिवालय बैठक बोलाएका छन्।</p>
<p>पार्टी प्रवक्ता नारायणकाजी श्रेष्ठले दुई अध्यक्ष, दुई वरिष्ठ नेतापछिको मर्यादाक्रममा एक उपाध्यक्ष हुने र उसलाई मुख्य तीन अधिकार रहने गरी विधान संशोधनको प्रस्ताव गरिएको जानकारी दिए। </p>
<p>“उपाध्यक्षका मुख्य तीन अधिकार रहने गरी विधानमा व्यवस्था गरिँदै छ”, श्रेष्ठले भने, “मुख्यतः अध्यक्षको काममा सहयोग गर्ने, अध्यक्ष नभएको अवस्थामा बैठकको अध्यक्षता गर्ने र पार्टीले दिएका जिम्मेवारीहरू पुरा गर्ने तीन अधिकारको व्यवस्था प्रस्ताव गरिएको छ। </p>
<p>यसअनुसार दुई अध्यक्ष केपी शर्मा ओली, पुष्पकमल दाहाल र वरिष्ठ नेताद्वय झलनाथ खनाल र माधवकुमार नेपालपछि गौतम पाँचौ वरीयतामा रहनेछन्। </p>
<p>३१ साउनको सचिवालय बैठकले गौतमलाई उपाध्यक्ष बनाउने प्रस्ताव स्थायी समितिमा लैजाने निर्णय गरे पनि बैठक बसेको छैन।</p>
<p>विधानमा उपाध्यक्षको व्यवस्था नभएकाले उनको प्रस्ताव अलपत्र थियो। </p>
प्रतिक्रिया दिनुहोस्
.jpg)
