सुरक्षा र न्याय पाउनबाट कोही पनि वञ्चित हुनुहुँदैनः गृहमन्त्री
<p>काठमाडौं। गृहमन्त्री रामबहादुर थापाले सुरक्षा र न्याय पाउनबाट कोही नागरिक पनि वञ्चित हुन नहुने बताएका छन्।</p>
<p>प्रहरी तालिम केन्द्र महाराजगञ्जमा आज आयोजित प्रहरी निरीक्षक आधारभूत तालिम ब्याच नम्बर १७९ को दीक्षान्त समारोहमा बोल्दै उनले सो कुरा बताएका हुन्।</p>
<p>“सुरक्षा र न्यायको आशा गरेर धेरै मानिसले प्रहरी नै खोज्छन्,” उनले भने, “कोही वञ्चित हुने हिसाबले काम गर्नु हुँदैन।”</p>
<p>गृहमन्त्री थापाले स्रोतसाधन अभावमा पनि नेपाल प्रहरीले उत्कृष्ट काम गर्दै आइरहेको भन्दै भौतिक पूर्वाधार, स्रोतसाधन र प्रविधिमैत्री बनाएर लगिने बताए।</p>
<p>१८ महीने तालिम सकेर कार्यस्थल प्रस्थान गर्ने प्रहरी निरीक्षकहरूलाई शान्ति सुरक्षा प्रदान गर्ने र राज्यले सुम्पेको जिम्मेवारी निर्वाह गर्न कुशलतापूर्वक लाग्न निर्देशन दिए।</p>
<p>सोही कार्यक्रममा नेपाल प्रहरीका महानिरीक्षक सर्वेन्द्र खनालले प्रहरीको नीलो बर्दीमा कोही कसैले कुनै प्रकारको दाग लगाउने प्रयास गरे सह्य नहुने बताए।</p>
<p>“कानूनको परिधिभित्र रहेर सबैले आफ्नो काम कुशलतापूर्वक निर्वाह गर्नुपर्छ,” उनले भने, “कुनै पनि आवरणमा हुने अपराध क्षम्य हुँदैन।”</p>
<p>१८ महीने लामो तालिम सकेर ९१ जना ‘पास आउट’ भएका छन्। तालिममा प्रहरी निरीक्षक किरण राउत प्रथम भए। अनिल थापा द्वितीय र सुवास खतिवडा तेस्रो भए।</p>
<p>राउत शारीरिक व्यायाम तथा आत्मबल अभिवृद्धि र प्रहरी युक्ति तथा कारबाहीमा समेत प्रथम भए। थापा अध्ययन र कवाजमा प्रथम भए। त्यस्तै चाँदमारीमा देवराज भट्टराई प्रथम भए।</p>
प्रतिक्रिया दिनुहोस्
.jpg)
