जानकी मन्दिरको वृहत गुरूयोजना निर्माण गरिने
<p>जनकपुर। धनुषाको जनकपुरमा रहेको जानकी मन्दिरको वृहत गुरूयोजना निर्माण गरिने भएको छ।</p>
<p>प्रदेश सरकारले २७ मंसीरमा आयोजना गरेको सर्वपक्षीय छलफलले गुरूयोजना बनाएर काम अघि बढाउने निर्णय गरेको हो।</p>
<p>मुख्यमन्त्री लालबाबु राउतको सक्रियतामा जानकी मन्दिर परिसरमा सर्वपक्षीय बैठक बसेको र जानकी मन्दिरको धार्मिक सांस्कृतिक महत्वलाई थप सशक्त बनाउनुका साथै धार्मिक पर्यटनमा वृद्धि गर्ने उद्देश्यसहित काम अघि बढाउने निर्णय भएको हो।</p>
<p>जानकी मन्दिरमा जारी सौन्दर्यीकरणलाई ३ महिनाभित्र सम्पन्न गर्दै थप सौन्दर्यीकरण गर्न तेलहा मरहा, विवाह मण्डपलाई समेटिने छ।</p>
<p>प्रदेश सरकार, जानकी मन्दिर, जनकपुरधाम उपमहानगरपालिका र पुरातात्व विभागको संयुक्त प्राविधिक टोलीले काम थाल्ने सहमति भएको छ। </p>
<p>टोलीले आवश्यकता अनुसार भारतीय साँस्कृतिक प्राविधिकको सहयोग लिन सक्ने मुख्यमन्त्री सचिवालयले जनाएको छ ।</p>
<p>मुख्यमन्त्री राउतले जानकी मन्दिर परिसरमा सवारीसाधन आवागमन निषेध गर्न र जानकी मन्दिर परिसरको सुरक्षा गर्न छिट्टै प्रहरी परिचालनको व्यवस्था मिलाउने बताए।</p>
<p>जानकी मन्दिरका उत्तराधिकारी महन्थराम रोशन दासको अध्यक्षतामा भएको बैठकमा प्रथम प्रदेश प्रमुख रत्नेश्वर लाल कायस्थसहित राजनीतिक दलका नेता, सुरक्षाकर्मी लगायत सरोकारवालाको सहभागिता रहेको थियो।<br />
</p>
प्रतिक्रिया दिनुहोस्
.jpg)
