Others

गृहपृष्ठ

सम्झौता अघिनै सकियो खानोपानीको काम चितवन। भरतपुर महानगरपालिका–१२ मा धनगढा सहलगानी खानेपानी आयोजनाको काम निर्माण अवधिभन्दा दुई महिना अगाडि नै सकिएको छ । सो आयोजनाको भरतपुर महानगर प्रमुख रेनु दाहालले उद्घाटन गरिन् । नेपाल सरकार भरतपुर खानेपानी व्यवस्थापन बोर्ड, संघीय खानेपानी तथा ढल व्यवस्थापन आयोजना, भरतपुर महानगर र उपभोक्ताको समेतको संयुक्त लगानीमा निर्मित खानेपानी आयोजनाको निर्माणको जिम्मा शर्मा सगरमाथा भीमेश्वर जेभीले लिएको थियो । दुई हजार एक सय १९ घरधुरीका १४ हजार पाँच सय ६३ जनालाई स्वच्छ खानेपानी प्रदान गर्ने उद्देश्यले खानेपानी आयोजना निर्माण थालिएको भरतपुर खानेपानी व्यवस्थापन बोर्डका कार्यकारी निर्देशक प्रजापति दाहालले बताए । यस आयोजना निर्माणका लागि २१ करोड ७७ लाख रूपैयाँ लागत अनुमान भएकामा निर्माण व्यवसायीले १२ करोड ७७ लाख रूपैयाँमा ठेक्का लिएर काम  सुरू गरी तोकिएको अवधिभन्दा दुई महिना अगाडि नै काम सकेको उनले बताए । आयोजना निर्माण पूरा भई पानी वितरण गरिरहेको र खानेपानी पाइप मर्मत र सञ्चालनमा अहिले चुनौती भएको उनको भनाइ छ । सडक र नाला विस्तारका क्रममा खानेपानीको पाइप काटिने कारणले मर्मतसम्भारमा समस्या भएको दाहालको भनाइ छ । भरतपुर महानगरका ९, ११ र १२ का वडावासीलाई नियमित पानी आपूर्ति गर्न १८ महिनामा निर्माण सक्ने उद्देश्यसहित विसं २०७४ जेठ २१ गते आयोजनाको निर्माण सम्झौता भएको थियो । सो अवसरमा भरतपुर महानगर प्रमुख दाहाल र उपप्रमुख पार्वती शाह ठकुरीले निर्माण व्यवसायीसहित खानेपानी आयोजना निर्माणमा लाग्ने उपभोक्ता समितिका पदाधिकारीलाई सम्मान गरे । कार्यक्रममा महानगर प्रमुख दाहालले महानगरवासीलाई सर्वसुलभ र स्वच्छ खानेपानी पुर्&zwj;याउने उद्देश्यका साथ महानगरमा धमाधम खानेपनी आयोजना सञ्चालन भइरहेको बताइन् ।