४ पुसभित्र सभामुखको टुंगो लाग्छः नेकपा नेता पौडेल
<p>काठमाडौं । सत्तारुढ नेपाल कम्युनिष्ट पार्टी (नेकपा) का स्थायी समिति सदस्य देवेन्द्र पौडेलले ४ पुसभित्र सभामुखको नाम टुंगो लाग्ने बताएका छन् ।</p>
<p>सभामुख चयनका विषयमा नेकपा निर्णय गर्ने अवस्थामा पुगेको उनले बताए । पौडेलले <em>देखापढी</em>सँग भने, “पार्टीले यसबारे छिटै निर्णय गर्छ, ४ पुसभित्र तपाईंहरूले सभामुखको नाम पाउनु हुन्छ ।”</p>
<p>करीब एक वर्षपछि पहिलोपटक बसेको नेकपाको स्थायी समिति बैठकमा आज अध्यक्ष पुष्पकमल दाहालले राजनीतिक प्रतिवेदन पेस गरेका छन्। प्रतिवेदनमा सरकारको कामको समीक्षादेखि केन्द्रीय कमिटीको बैठक बोलाउने र सीमा विवादको समाधान सुझाउने विषयसमेत समेटिएका छन्।</p>
<p>पौडेलले स्थायी समिति सदस्यहरूले अध्यक्ष दाहाललाई एक वर्षसम्म बैठक नबस्नुको कारणबारे प्रश्न गरेको समेत बताए । उनले भने, “अध्यक्षद्वयको कार्यविभाजन भएकाले अब सक्रियता बढ्नेछ, पार्टीका तल्लो तहदेखि माथिल्लो तहसम्म सघन छलफल हुनेछन्।”</p>
<p>उनले प्रतिपक्ष सुस्त रहेको अवस्थामा सरकार सक्रिय भएर काममा केन्द्रित हुनुको विकल्प नरहेको समेत बताए।</p>
प्रतिक्रिया दिनुहोस्
.jpg)
