सिन्धुपाल्चोक दुर्घटनामा राष्ट्रपतिद्वारा दुःख व्यक्त
<p>काठमाडौं। राष्ट्रपति विद्यादेवी भण्डारीले सिन्धुपाल्चोकमा आज भएको बस दुर्घटनाप्रति दुःख व्यक्त गरेकी छन्।</p>
<p>उनले ट्वीट गर्दै दुर्घटनामा ठूलो मानवीय क्षति भएको खबरले स्तब्ध भएको बताइन्। साथै राष्ट्रपति भण्डारीले शोकाकुल परिवारमा समवेदना तथा घाइतेहरूको शीघ्र स्वास्थ्यलाभको कामनासमेत गरेकी छन्।</p>
<p>ट्वीटमा भनेकी छन्, ‘हालैका दिनमा निरन्तर भइरहेको सवारी दुर्घटनालाई रोक्नका लागि आवश्यक कदम चाल्न सम्बन्धित सबैलाई हार्दिक आह्वान गर्दछु।’</p>
<p>सिन्धुपाल्चोकको सुनकोशी गाउँपालिका–७ स्थित ६ किलो भन्ने स्थानमा आज बस दुर्घटना हुँदा मृत्यु हुनेको संख्या १५ पुगेको छ।</p>
<p>दोलखाको कालिन्चोक भगवती मन्दिरको दर्शन गरेर भक्तपुर फर्कँदै गरेको बस लामोसाँघु–जिरी सडक खण्डमा दुर्घटना भएको सिन्धुपाल्चाेक प्रहरीले जनाएको छ।</p>
<p>बा४ख ४४६८ नम्बरको रिजर्भ बस सडकबाट करीब ५०० मिटर तल खसेको प्रहरीले जनाएको छ। दुर्घटनामा ९ महिला, तीन पुरुष, एक बालिका र दुई बालकसहित १५ जनाको मृत्यु भएको प्रहरीकाे भनाइ छ।</p>
प्रतिक्रिया दिनुहोस्
.jpg)
