Others

गृहपृष्ठ

चलचित्र विकास बोर्डका अध्यक्ष केशब भट्टराईको निधन काठमाडौं। चलचित्र विकास बोर्डका अध्यक्ष केशब भट्टराईको निधन भएको छ।  गएराति अनामनगरस्थित घरमै हर्ट अट्याक भएपछि भट्टराईलाई उपचारका लागि ओम अस्पताल लगिएको थियो। जहाँ चिकित्सकले भट्टराईलाई मृत घोषणा गरेको चलचित्र निर्देशक मनोज पंडितले जानकारी दिए। भट्टराई ५१ वर्षका थिए। भट्टराईको शवको आज त्रिवि शिक्षण अस्पताल महाराजगञ्जमा पोस्टमार्टम गरिने र दिउँसो २ बजे चलचित्र विकास बोर्डको कार्यालयमा श्रद्धाञ्जलीका लागि राखिने भएको छ। त्यस्तै २८ मंसीरमा निधन भएका अर्का अभिनेता दीपक क्षेत्रीको शव पनि श्रद्वाञ्जलीका लागि २ बजे नै बोर्डको कार्यालयमा राखिने छ। भट्टराईले नेपाली चलचित्र र टेलिसिरियलमा अभिनय गर्दै आएका थिए। तीन दशक अघि बनेको चलचित्र कोशेलीमा भट्टराईले पहिलोपटक अभिनय गरेका थिए। भट्टराईले आफ्नो मान्छे, छाडी गए पाप लाग्ला, देवर बाबु, कर्मयोद्धा, बलिदान, सो सिम्पल, ब्रासलेट लगायतका चलचित्र निर्माण गरेका छन्। भट्टराई ९ महीनाअघि चलचित्र विकास वोर्डको अध्यक्ष  भएका थिए। भट्टराईका एक श्रीमती र एक छोरा छन्।