त्रिभुवन आर्मीको संघर्षपूर्ण जित
<p>काठमाडौं। नवयुग श्रेष्ठ र दिनेश हेनजनको गोलमा त्रिभुवन आर्मी क्लबले आज फ्रेन्ड्स क्लबमाथि २–१ को नतिजा निकाल्दै शहीद स्मारक ‘ए’ डिभिजन लिगमा आफ्नो दाबेदारी प्रस्तुत गरेको छ।</p>
<p>त्रिभुवन आर्मीले तुलनात्मकरूपमा कमजोर मानिएको फ्रेन्ड्सविरुद्ध सहज नतिजा निकाल्न भने सकेन। नवयुग श्रेष्ठले तेस्रो मिनेटमै गरेको गोलमा त्रिभुवन आर्मीले अग्रता लिएको थियो। नवयुगले ‘वान भर्सेस वान’ मा फ्रेन्ड्सका गोलकिपर देब लिम्बुलाई ‘बिट’ गर्दै बललाई पोष्टको दिशा दिएका थिए।</p>
<p>५१औं मिनेटमा शक्ति राईको गोलबाट फ्रेन्ड्सले पुनगरामगनको संकेत गरेको थियो। तर, पाएका केही राम्रा अवसर सदुपयोग गर्न नसक्दा फ्रेन्ड्सले अग्रता बनाउने मौका गुमायो।</p>
<p>खेल सकिन ९ मिनेट बाँकी रहँदा दिनेशले गोल गरेपछि त्रिभुवन आर्मीको जित पक्का भएको थियो। भरत खवासकाे कर्नर प्रहार राम्रोसँग क्लियर नभएको बललाई पेनाल्टी क्षेत्रमा कसैको निगरानीमा नरहेका दिनेशले पोष्टको दिशा दिए। दिनेश म्यान अफ दी म्याच घोषित भए।</p>
<p>गत सिजन पनि उपाधि दाबेदार मानिएको त्रिभुवन आर्मीले अन्ततः चौथो स्थानमा रहेर लिगको अन्त्य गरेको थियो। फ्रेण्ड्स भने गत सिजन ११औं स्थानमा थियो।</p>
प्रतिक्रिया दिनुहोस्
.jpg)
