च्यासलद्वारा संकटा क्लब २-० ले पराजित
<p>काठमाडौं। भेट्रान फरवार्ड सन्तोष साउखलको दुई गोलमा च्यासल युथ क्लबले आज संकटा क्लबलाई २-० ले पराजित गरेको छ।</p>
<p>साउखलले ४१औं मिनेटमा च्यासललाई अग्रता दिएका थिए। साउखलले हेमन्त थापामगरको पासमा गोल गरेका हुन्।</p>
<p>खेल सकिन ६ मिनेट बाँकी रहँदा साउखलले अर्को गोल थप्दै च्यासलको जित पक्का गरेका थिए। अमीर श्रेष्ठले दिएको पासमा साउखलले पेनाल्टी क्षेत्रबाट हानेको प्रहार संकटाका गोलकिपर विनय श्रेष्ठले ठम्याउन सकेनन्।</p>
<p>त्यसअघि ७१औं मिनेटमा सुनिल बलले हानेको फ्रिकिक संकटाका गोलकिपरले मुस्किलले बचाएका थिए।</p>
<p>७८औं मिनेटमा सुवास गुरुङले १८ यार्डबाट हानेको प्रहार च्यासलका गोलकिपर एलेन न्यौपानेले जाेगाएपछि संकटाले बराबरी गर्ने मौका गुमाएको थियो। संकटा गत वर्ष दोस्रो स्थानमा थियो।</p>
प्रतिक्रिया दिनुहोस्
.jpg)
