ठेकेदारविरुद्ध सांसदले दिए गृहमन्त्रालयमा उजुरी
<p>काठमाडौं। प्रतिनिधिसभा सदस्य विशाल भट्टराईले ठेकेदार कम्पनीविरुद्ध गृहमन्त्रालयमा उजुरी दर्ता गराएका छन्।</p>
<p>खोटाङबाट निर्वाचित सांसद भट्टराईले निर्माण कार्यमा ढिलासुस्ती गर्ने निर्माण कम्पनीलाई कालोसूचीमा राख्न माग गर्दै गृहमन्त्रालयमा उजुरी दर्ता गराएका हुन्।</p>
<p>उनले खोटाङमा निर्माणाधिन पक्की पुलहरूको काम ठेक्काको म्याद सकिंदा पनि नसकेको भन्दै गौरीपार्वती निर्माण सेवा र गजुरमुखी हरिहरी जेभीविरुद्ध उजुरी दर्ता गराएका छन्। </p>
<p>गौरीपार्वतीले फोक्सिङटार पुल र गजुरमुखी हरिहरी जेभीले साप्सुखोला पुल निर्माणको जिम्मा लिएका छन्। </p>
<p>उनले आफूले पटक–पटक सडक विभाग र सम्बन्धित व्यवसायीसँग पुल निर्माणको काम समयमै सक्न छलफल तथा दबाब दिंदै आएपनि नभएको उल्लेख गरेका छन्। </p>
<p>भट्टराईले यस विषयमा आफूले संसदमा समेत आवाज उठाएको बताएका छन्। </p>
<p>‘म्याद सकिंदा पनि पुल निर्माणको काममा विलम्ब गरी संसद, सरकार, कानून, जनप्रतिनिधि र जनताको आवाजलाई पुरापुर वेवास्ता गर्नेलाई कारबाही नगर्ने हो भने मुलुक समृद्ध बनाउने हाम्रो सपना निर्माण व्यवसायीका नाममा कलंकित बनेका केही व्यवसायीका कारण चकनाचुर हुने देखिन्छ’, सांसद भट्टराईले उजुरीमा भनेका छन्।</p>
प्रतिक्रिया दिनुहोस्
.jpg)
