अन्तर्राष्ट्रिय खेलाडी कसलाई मान्ने?, जुटेन सहमति
<p>काठमाडौं। प्रतिनिधिसभा, शिक्षा तथा स्वास्थ्य समितिको बैठकमा ‘अन्तर्राष्ट्रिय खेलाडी कसलाई मान्ने’ भन्नेमा सहमति जुट्न सकेको छैन।</p>
<p>‘खेलकुद विकाससम्बन्धी व्यवस्था गर्न बनेको विधेयक, २०७५’ माथिको आजको दफावार छलफलमा समितिका सदस्यका बीचमा सहमति जुट्न नसकेको हो।</p>
<p>समितिको बैठकमा गएको १ पुसदेखि छलफल हुँदै आएको छ। समितिका सदस्यले अन्तर्राष्ट्रिय खेलमा सहभागी हुने सबै खेलाडीलाई अन्तर्राष्ट्रिय खेलाडी मान्नुपर्ने धारणा राखेका थिए।</p>
<p>तर, युवा तथा खेलकुदमन्त्री जगतबहादुर विश्वकर्माले अन्तर्राष्ट्रिय खेलमा पदक जितेकालाई मात्र अन्तर्राष्ट्रिय खेलाडी मान्नुपर्ने बताए। </p>
<p>बैठकमा सहमति जुट्न नसकेपछि मन्त्रालयले यो विषयमा पुनःलेखन गरेर ल्याउने जनाएको छ।</p>
<p>“अन्तर्राष्ट्रिय प्रतियोगितामा सहभागी खेलाडीलाई अन्तर्राष्ट्रिय खेलाडी मान्ने हो भने अहिले साग प्रतियोगितामा सहभागी ६०० खेलाडीलाई अन्तर्राष्ट्रिय खेलाडी मान्नुपर्दछ”, मन्त्री विश्वाकर्मा भने, “ओलम्पिकको छाताभित्र रहेका धेरै खेलका संघ र महासंघ छन्। तिनले आयोजना गर्ने खेलमा सहभागी खेलाडीलाई पनि अन्तर्राष्ट्रिय खेलाडी मान्ने हो भने कहीँकतै अन्तर्राष्ट्रिय खेलाडीको परिभाषाले अर्कै अर्थ लाग्न सक्छ।”</p>
<p>नेपाल ओलम्पिक कमिटीका अध्यक्ष समेत रहेका समितिका सदस्य जीवनराम श्रेष्ठले अन्तर्राष्ट्रिय प्रतियोगितामा सहभागी सबै खेलाडीलाई अन्तर्राष्ट्रिय खेलाडी मान्नुपर्ने बताए।</p>
<p>“अहिले हामीले खेलाडीलाई खासै केही गर्न सकेका छैनौँ”, उनले भने, “त्यसैले खेलाडीको मनोबल उच्च राख्न र सम्मानका लागि खेलमा सहभागी सबै खेलाडीलाई अन्तर्राष्ट्रिय खेलाडी मान्नुपर्दछ।”<br />
समिति सदस्य गगन थापाले कुन–कुन क्षेत्रमा सहभागी खेलाडीलाई अन्तर्राष्ट्रिय खेलाडी मान्ने मापदण्ड बनाउनुपर्ने बताए। <em>–रासस </em><br />
</p>
प्रतिक्रिया दिनुहोस्
.jpg)
