हिमालयन शेर्पा फेरि बराबरीमा रोकियो
<p>काठमाडौं। हिमालयन शेर्पा क्लबले आज शहीद स्मारक ‘ए’ डिभिजन लिगमा सशस्त्र प्रहरी बल (एपीएफ)सँग १–१ को बराबरी खेलेको छ। दोस्रो हाफको शुरूमै लिएको अग्रता जोगाउन नसक्दा हिमालयन शेर्पाले लगातार दोस्रो खेल बराबरीमा चित्त बुझाउनु पर्‍यो।</p>
<p>हिमालयन शेर्पाले नेपाल पुलिस क्लबसँग गोलरहित बराबरी खेलेको थियो भने एपीएफले मनाङ मर्स्याङ्दीसँग २–० ले पराजित भएको थियो।</p>
<p>४६औं मिनेटमा त्रिदेव गुरुङको गोलमा हिमालयन शेर्पाले अग्रता लिएको थियो। विश्वास श्रेष्ठको कर्नरमा आशिष तामाङले गरेको हेड राम्रोसँग क्लियर भएन। त्यही बललाई त्रिदेव गुरुङले हेडबाट गोल गर्दै हिमालयन शेर्पालाई अग्रता दिएका थिए।</p>
<p>५९औं मिनेटमा एपिएफका प्रविनकुमार स्याङ्तानले बराबरी गोल फर्काए। हिमालयन शेर्पाका नीरज बस्नेतले गरेको गल्तीमा आशिष तामाङले बल नियन्त्रणमा लिँदै दायाँ कर्नरबाट आशिष गुरुङलाई बिट गर्दै गरेको क्रसलाई प्रविनकुमारले पोष्टको दिशा दिएका थिए।</p>
<p>त्यसअघि ३१औं मिनेटमा एपीएफका नवीन लामाले पेनाल्टी क्षेत्रबाट खाली पोष्टमा गोल गर्न नसक्दा एपीएफले अग्रता लिने मौका गुमाएको थियो।</p>
प्रतिक्रिया दिनुहोस्
.jpg)
