काठमाडौंमा चिनियाँ नागरिक पक्रन प्रहरीको ‘अप्रेसन’, १२२ जना पक्राउ
<p>काठमाडौं। पर्यटक भिसामा नेपाल आएका चिनियाँ नागरिकले संगठित रूपमा अपराध गर्न लागेको सूचनापछि प्रहरीले आज दिनभर ‘सर्च अप्रेसन’ चलाएको छ।</p>
<p>प्रहरी प्रधान कार्यालयको निर्देशनमा नेपाल प्रहरीको केन्द्रीय अनुसन्धान ब्यूरो (सीआईबी), महानगरीय अपराध महाशाखा र महानगरीय प्रहरी परिसर काठमाडौंले संयुक्त रूपमा यो कारवाही चलाएका हुन् । </p>
<p>त्यसक्रममा प्रहरीले काठमाडौंको मनमैजु, बाँसबारी र बुढानिलकण्ठ क्षेत्रमा छापा मार्दा ती ठाउँमा चिनियाँ नागरिक घर भाडामा लिएर बसेकोसमेत खुलेको छ।</p>
<p>“संगठित भएरै अपराध गर्न सक्ने भन्ने माथिल्लो निकायकोसमेत निर्देशन र हामीलाई प्राप्त सूचनापछि अप्रेशन चलाएका हौं”, केन्द्रीय अनुसन्धान ब्यूरोका प्रमुख, डीआईजी निरजबहादुर शाहीले देखापढीसँग भने, “अहिलेसम्म १२२ जना पक्राउ परेका छन्। अझै अप्रेसन जारी छ।”</p>
<p>उनका अनुसार पक्राउ परेका सबै चिनियाँ नागरिक हुन्। त्यसमा केही महिलासमेत छन्। उनीहरूको साथबाट प्रहरीले करिब ४ सयको हाराहारीमा ल्यापटप बरामद गरेको छ। त्यस्तै मोबाइल लगायतका महत्वपूर्ण अन्य केही कागजातसमेत बरामद गरेको प्रहरीले जनाएको छ।</p>
<p>“पर्यटक भएर आए पनि उनीहरूको दैनिक गतिविधि निकै शंकास्पद देखिएको थियो”, डीआईजी शाहीले भने, “निगरानी बढाएर उनीहरूको क्रियाकलाप हेरिरहेका थियौं, त्यसपछि आज अप्रेसन चलाएका हौं।”</p>
<p>उनले ती चिनियाँ नागरिकको योजना के थियो भन्ने अनुसन्धानपछि खुल्ने बताए। आज पक्राउ गर्ने क्रममा केहीले प्रहरीसँग विवादसमेत गरेका थिए। पक्राउ परेका चिनियाँ नागरिकलाई प्रहरीले महानगरीय प्रहरी परिसर काठमाडौंअन्तर्गतका वृत्त र प्रभागहरूमा राखिने जनाएको छ । </p>
<p>गत भदौमा बैंक ह्याकिङ गर्ने चिनियाँ नागरिक लिन जियानमेङ, लुओ जियालेइ, झु लियानग्याङ, क्वी युनकिङ, चेन बिन बिन र फ्रेन्च नागरिक सु लुसिङ पक्राउ परेका थिए।</p>
<p>अहिले पक्राउ परेका चिनियाँ नागरिकको योजना बैंकिङ प्रणाली ह्याकिङदेखि अन्य गम्भीर अपराध गर्नेसमेत रहेको हुन सक्ने आशंका प्रहरीको छ। </p>
<p><br />
</p>
प्रतिक्रिया दिनुहोस्
.jpg)
