घरायसी विवादमा गरे जेठाजुले बुहारीको हत्या
<p>धनुषा। धनुषामा एक जेठाजुले आफ्नै बुहारीलाई खुकुरी प्रहार गरी हत्या गरेका छन्। </p>
<p>धनुषाको मिथिला नगरपालिका–९ मा घरायसी विवादका कारण जेठाजु श्रीप्रसाद पंजियारले बुहारी ३८ वर्षीया रानीदेवी पंजियारलाई खुकुरी प्रहार गरी हत्या गरेका प्रहरीले जनाएको छ। </p>
<p>रानीदेवीका श्रीमान वैदेशिक रोजगारीमा छन्। </p>
<p>जनकपुरधाम उपमहानगरपालिका–२१ कुर्थाका श्रीप्रसाद साहले बहिनीको घर बडहरी गएकी रानीलाई खुकुरी प्रहार गरेका हुन्। बडहरीमा श्रीप्रसादका साढुको घर रहेको छ। </p>
<p>खुकुरी प्रहारबाट गम्भीर घाइते भएकी रानीको उपचारको क्रममा प्रादेशिक अस्पताल जनकपुरमा मृत्यु भएको इलाका प्रहरी कार्यालय ढल्केवरका प्रमुख, प्रहरी निरीक्षक रामकुमार यादवले जानकारी दिए।</p>
<p>उपचारकै क्रममा रानीले जेठाजु श्रीप्रसादले आफूलाई घरायसी विवादको कारणले पछाडीबाट खुकुरी प्रहार गरेको प्रहरीसमक्ष बयान दिएको यादवले बताए। </p>
<p>खुकुरी प्रहारबाट रानीको टाउकोमा ३ वटा घाउ देखिएको उपचारमा संलग्न चिकित्सकहरूले बताएका छन्।</p>
<p>घटनापश्चात श्रीप्रसाद फरार रहेकाले खोजतलास भइरहेको प्रहरीले जनाएको छ। </p>
प्रतिक्रिया दिनुहोस्
.jpg)
