शुक्लाफाँटामा अस्ताइन् ‘रतनकली’
<p>भीमदत्त। २०३५ सालमा ल्याइएको हात्ती ‘रतनकली’ को १० पुस राति मृत्यु भएको छ । कञ्चनपुरको शुक्लाफाँटा राष्ट्रिय निकुञ्जको हात्तीसारमा रहेको ८४ वर्षीया रतनकलीको चराउन निकुञ्ज लगेका बेला मृत्यु भएको शुक्लाफाँटा राष्ट्रिय निकुञ्जका प्रमुख संरक्षण अधिकृत लक्ष्मण पौड्यालले बताए। </p>
<p>“हात्तीसारका कर्मचारीले बिहीबार रतनकलीलाई चराउन छेउँमै लगेका थिए,” प्रमुख संरक्षण अधिकृत पौड्यालले भने, “चर्दाचर्दै हात्ती बस्यो, हात्तीसार ल्याउन नसकेपछि कर्मचारीले राति पहरा दिँदै गर्दा निधन भयो।”</p>
<p>रतनकलीलाई ४१ वर्षअघि चितवन राष्ट्रिय निकुञ्जबाट शुक्लाफाँटा ल्याइएको थियो । “बिरामी थिएन। बुढेसकाल लागेर मृत्यु भएको हो”, उनले भने, “विधिप्रक्रिया अनुसार शुक्रबार अन्त्येष्टि गरियो।”</p>
<p>हात्तीको औसत आयु ७० देखि ८० वर्ष हुन्छ। रतनकलीको अन्येष्टिमा ११ पुसमा निकुञ्ज प्रशासन, स्थानीय वडा कार्यालय, मध्यवर्ती, सेना र हात्तीसारका कर्मचारी सहभागी रहेको निकुञ्ज कार्यालयले जनाएको छ।</p>
<p>निकुञ्जमा दश वटा हात्तीको दरबन्दी रहे पनि सात वटा मात्रै थिए। प्रमुख संरक्षण अधिकृत ढकालले निकुञ्जको गस्ती, पर्यावरणका लागि अझै पाँच वटा हात्ती आवश्यक रहेको बताए। <em>रासस</em><br />
</p>
प्रतिक्रिया दिनुहोस्
.jpg)
