बैंक ह्याकिङका एजेन्ट स्याङ्जाबाट पक्राउ
<p>काठमाडाैं। कृषि विकास बैंकको सफ्टवेर ह्याक गरेर रकम निकालिएको घटनामा संलग्न एजेन्टलाई महानगरीय अपराध नियन्त्रण महाशाखाको टोलीले आज दिउँसो स्याङ्जाको वालिङबाट पक्राउ गरेको छ।</p>
<p>सोही घटनामा संलग्न रहेका ११ जनामध्ये उनीसहित ६ जनालाई पक्राउ गरिएको र अझै पाँच जना फरार रहेको महाशाखाले जनाएको छ। पक्राउ पर्नेमा प्रतीक्षा निर्माण सेवाका प्रोपाइटर रामकृष्ण भुसाल रहेको महाशाखाका प्रहरी वरिष्ठ उपरीक्षक सहकुलबहादुर थापाले जानकारी दिए।</p>
<p>उनलाई स्याङ्जा प्रहरीको सहयोगमा पक्राउ गरिएको र काठमाडौं ल्याएर घटनाको अनुसन्धान गरिने उनले बताए। उनको बैंक खातामा ६५ लाख जम्मा भएपछि उनले निकाल्न भ्याएका थिएनन्।</p>
<p>यसअघि महाशाखाको टोलीले पानस रेमिट र कृषि विकास बैंकको सफ्टवेयर ह्याक गरेर पैसा निकाल्ने नेपाली एजेन्ट गरी १२ जनालाई आइतबार पक्राउ गरी अनुसन्धान गरिरहेको छ।</p>
<p>प्रहरीका अनुसार उनीहरूले कृषि विकास बैंकबाट सफ्टवेयर ह्याक गरी चार करोड ७३ लाख ९६ हजार विभिन्न व्यक्तिको नाममा पैसा पठाएको तथा पानस रेमिट नयाँ बानेश्वरबाट १२ लाख निकालेका थिए।</p>
<p>त्यसमध्ये १० लाख हुण्डीमार्फत् विदेशी ह्याकरलाई पैसा पठाए पनि अन्य पैसा लैजान नपाएको प्रहरीले जनाएको छ। प्रहरीले ६० लाख बरामद गरिसकेको छ। यसका मुख्य योजनाकार अफ्रिकी मूलका पिटर रहेको र उनले भारतमा बसेर योजना बनाई नेपाली एजेन्टलाई प्रयोग गरेका थिए। उनले पाँच अर्ब निकाल्ने योजना बनाएको खुल्न आएको छ। <em>रासस</em></p>
प्रतिक्रिया दिनुहोस्
.jpg)
