Others

गृहपृष्ठ

के गर्दैछिन् प्रिंयका ? काठमाडौं। नेपाली सिनेमा उद्योगमा पछिल्ला केही वर्ष प्रियंका कार्कीको एकछत्र राज  चल्यो। निर्माता–निर्देशकहरू उनलाई आफ्नो चलचित्रमा लिन हानथाप गर्थे। रेखा थापापछि अति व्यस्त कुनै अभिनेत्री थिइन् भने प्रियंका नै थिइन् । यहीकारण हुन सक्छ, उनले थुप्रै चलचित्रमा अभिनय गरिन्। तर, संख्यात्मक रूपमा धेरै चलचित्रमा जोडिए पनि गुणस्तरीय चलचित्रमा भने उनको ध्यान पुगेन। त्यहीकारण केही वर्ष अघिसम्म प्रियंकाबेगरको चलचित्र बनाउँदिन भन्ने निर्माताहरू पनि नयाँ अभिनेत्री लिन थालेका छन्। प्रियंकालाई अहिले ‘नाईं नभन्नू ल’ र ‘छक्का पञ्जा’ सिरिजले जोगाएको छ। निर्माणको तयारीमा रहेका ‘नाईं नभन्नू ल–६’ र ‘छक्का पञ्जा–४’ मा उनी समेटिनेछिन्, तर सानो भूमिकामा मात्र। प्रियंका पछिल्लो पटक ‘प्रेम दिवस’मा देखिएकी थिइन्, जसमा उनी प्रेमी आयुष्मान देशराज जोशीकै जोडी बनेकी थिइन्। ‘हेल्लो जिन्दगी’पछि प्रियंकाले अरू चलचित्रमा काम गरेकी छैनन्। यो चलचित्रको छायांकन सकिएको ६ महिना बितिसकेको छ। केही वर्ष अघिसम्म दिनरात फिल्मको छायांकनमा व्यस्त हुने प्रियंका यतिबेला एकातिर म्यूजिक भिडियोमा व्यस्त छिन् भने अर्कोतिर ‘भिजिट नेपाल २०२०’को क्यालेण्डर निर्माणमा। प्रियंकाले व्यस्तताबारे देखापढीसँग भनिन्, “अहिले फिल्मलाई स्टप राखेकी छु। क्यालेन्डर निर्माण भइरहेको छ। त्यसैमा व्यस्त छु।” उनले हातमा चलचित्र आउन छाडेको भन्ने कुरामा असहमति जनाइन्। भनिन्, “अहिले  भिजिट नेपाल २०२० सफल पार्नुपर्ने सबै नेपालीको दायित्व छ। त्यही भएर चलचित्रको काम रोकेर राखेकी छु।” यो अभियानबाट बचेको समय म्यूजिक भिडिओमा दिइरहेको उनले बताइन्। “चलचित्रका लागि निकै लामो समय चाहिन्छ, त्यही भएर म्यूजिक भिडिओ र भिजिट नेपाल २०२० को काममा व्यस्त छु”, उनले भनिन्, “कतिपयलाई मेरो हातमा चलचित्र नै परेको छैन भन्ने पनि लागेको हुन सक्छ।”