फिलिपिन्समा मृत्यु हुनेको संख्या ४७ पुग्यो, ९ अझै बेपत्ता
<p>फिलिपिन्स। फिलिपिन्समा आएको आँधीका कारण मृत्यु हुनेको संख्या बढ्दै गइरहेको छ। अधिकारीहरूले दिएको जानकारी अनुसार आजसम्म मृत्यु हुनेको संख्या बढेर ४७ पुगेको छ भने अरू ९ जना अझै हराइरहेका छन्।</p>
<p>राष्ट्रिय प्रकोप व्यवस्थापन परिषद्का अनुसार मध्य र उत्तरपूर्वी फिलिपिन्सका चार ठाउँमा मृत्यु हुनेहरूको कूल संख्या ४७ पुगेको हो।</p>
<p>परिषद्का अनुसार इलोइलोमा १६ जना, कापिजमा पाँचजना, अक्लानमा पाँचजना, सेबु र दक्षिणी लेयाटमा एक/एकजना, लेयाटमा पाँचजना, विलिरनमा एकजना, पूर्वी सामरमा पाँचजना, सामरमा एकजना, ओरियन्टल मिन्डोरोमा पाँचजना र अक्सीडेन्टल मिन्डोरोमा दुईजनाको मृत्यु भएको छ। </p>
<p>घटनामा परी १४० भन्दा बढी व्यक्ति घाइते भएका छन्। प्रहरी र स्थानीय अधिकारीहरुले डुबानमा परेर, रुखले च्यापेर र विद्युतका कारण उनीहरूको मृत्यु भएको जनाएका छन्।</p>
<p>हजाराैं व्यक्ति अझै पनि विस्थापित भएकोले उनीहरूलाई सहयोगको आवश्यकता भएको बताइएको छ।</p>
<p>प्रतिघण्टा १९५ किलोमिटरको गतिमा आँधी आएको थियो। आँधीपछि फिलिपिन्समा विद्युत् सेवा, मोबाइल फोन र इन्टरनेटको नेटवर्क अवरुद्ध भएको थियो।</p>
<p>कतिपय ठाउँमा यसका संरचनामा क्षति पुगेको अधिकरीले जनाएका छन्। त्यसैगरी सडक र विमानस्थलमा पनि ठूलो मात्रामा क्षति भएकाले धेरै समय उडान सेवा र यातायात सेवा रद्ध गरिएको थियो। <em>(रासस/सिन्ह्वा)</em></p>
प्रतिक्रिया दिनुहोस्
.jpg)
