पूर्व प्रधानमन्त्रीद्धय देउवा र नेपालसँग अमेरिकी राजदूतको छुट्टाछुट्टै भेट
<p>काठमाडौं। अमेरिकी राजदूत र्‍यान्डी डब्ल्यू बेरीले नेपाली कांग्रेसका सभापति तथा पूर्व प्रधानमन्त्री शेरबहादुर देउवा र अर्का पूर्व प्रधानमन्त्री तथा नेकपाका नेता माधवकुमार नेपालसँग आज छुट्टाछुट्टै भेटवार्ता गरेका छन् । </p>
<p>राजदूत बेरी देउवालाई भेट्न उनको निवास बुढानिलकण्ठ र नेपाललाई भेट्न उनकै निवास कोटेश्वर पुगेका थिए । </p>
<p>सभापति देउवासँग भएको भेटवार्तामा समसामयिक राजनीति र द्विपक्षीय हितका विषयमा छलफल भएको सभापति देउवाका सहयोगी भानु देउवाले जानकारी दिए । भेटमा द्विपक्षीय सम्बन्धलाई थप मजबुत बनाउने र दुई देशबीचको दशकौंदेखिको विकास साझेदारीलाई थप प्रभावकारी बढाउनेलगायत विषयमा छलफल भएको थियो । </p>
<p>त्यस्तै नेता नेपालसँगको भेटमा नेपाल र अमेरिका सम्बन्धको इतिहास स्मरण गरिनुका साथै पछिल्ला घटनाक्रमका विषयमा छलफल भएको नेपालको सचिवालयले जनाएको छ ।</p>
<p>उनीहरूबीच नेपालका लागि अमेरिकी सहयोग, नेपालको विकासको सम्भावना तथा दुई देशबीचको पारस्पारिक सम्बन्धका विविध पक्षमा कुराकानी भएको बताइएको छ ।</p>
<p>आजको भेटवार्ताले दुई देशबीचको कूटनीतिक सम्बन्धमा थप सकारात्मक योगदान दिने नेता नेपालको सचिवालयले जनाएको छ । <em>रासस</em><br />
</p>
प्रतिक्रिया दिनुहोस्
.jpg)
