‘नेपाल भ्रमण वर्ष- २०२०’ को शुभारम्भ आज
<p>काठमाडौं। ‘नेपाल भ्रमण वर्ष- २०२०’ आजदेखि शुरू हुँदैछ। </p>
<p>काठमाडौँको दशरथ रंगशालामा भव्य समारोहका बीच भ्रमण वर्षको औपचारिक शुभारम्भ गरिनेछ। </p>
<p>राष्ट्रपति विद्यादेवी भण्डारीले भ्रमण वर्षको औपचारिक शुभारम्भ गर्ने छिन्। प्रधानमन्त्री केपी शर्मा ओलीले विशेष सम्बोधन गर्ने कार्यक्रम तय भएको छ। </p>
<p>भ्रमण वर्षको भव्य उद्घाटनको सम्पूर्ण तयारी पूरा भएको भ्रमण वर्ष सचिवालयले जनाएको छ। </p>
<p>भ्रमण वर्षको उद्घाटनस्थल रंगशालामा १५ पुस साँझ पूर्वाभ्याससमेत गरिएको थियो। </p>
<p>उद्घाटन समारोहलाई विशेष बनाउन सबै तयारी गरिएको सचिवालयले जनाएको छ।</p>
<p>आज अपराह्न ४ बजेदेखि शुरू हुने औपचारिक कार्यक्रम पाँच घण्टासम्म चल्नेछ। सहभागी पाहुनाको स्वागत ‘सेलिब्रेटी’ बाट गरिनेछ। </p>
<p>नेपालको संस्कृति झल्कने नाचगानबाट शुरू हुने कार्यक्रममा नेपाल प्रहरी, सशस्त्र प्रहरी, नेपाली सेनाको सहयोगमा राष्ट्रगान बजाइनेछ।</p>
<p>बाजागाजासहित रंगशालामा भ्रमण वर्ष २०२० को मानव साङ्लो बनाइनेछ। कुटुम्ब ब्याण्डको सांगीतिक प्रस्तुतिमा विभिन्न संघसंस्थाले परेड गर्नेछन्।</p>
<p>संस्कृति, पर्यटन तथा नागरिक उड्डयनमन्त्री योगेशकुमार भट्टराईले स्वागत मन्तव्य राख्ने छन्। </p>
<p>उद्घाटन समारोहमै भ्रमण वर्षको राष्ट्रिय गीतसमेत सार्वजनिक गरिनेछ।</p>
<p>भ्रमण वर्षको ‘यति मस्कट’ को सार्वजनिकसँगै विभिन्न सांस्कृतिक कार्यक्रमको तालिका बनाइएको छ।</p>
<p>सरकारले सन् २०२० लाई नेपाल भ्रमण वर्षको रूपमा मनाएर उक्त अवधिमा २० लाख विदेशी पर्यटक भित्र्याउने लक्ष्य लिएको छ। </p>
<p>सन् २०१८ मा १२ लाख हाराहारीमा विदेशी पर्यटकले नेपाल भ्रमण गरेका थिए।</p>
<p>‘नेपाल भ्रमण वर्ष–२०२०’ को उद्घाटन समारोहमा सहभागी हुन विदेशी पाहुना काठमाडौं आइसकेका छन्। </p>
<p>भ्रमण वर्षको औपचारिक शुभारम्भ समारोहमा सहभागी हुन छिमेकी मुलुक भारत, चीनसहित विभिन्न देशका पर्यटनमन्त्री तथा विशिष्ट पाहुना काठमाडौं आइपुगेका हुन्। </p>
<p>भ्रमण वर्षको उद्घाटन कार्यक्रमका लागि दक्षिण एशियाली, मध्यपूर्वी, युरोपलगायत मुलुकका ३४ वटा सञ्चारमाध्यमका प्रतिनिधि पनि आएको बताइएको छ। </p>
प्रतिक्रिया दिनुहोस्
.jpg)
