खुला ठाउँमा शौच गरेको आरोपमा दलित बालबालिकाको हत्या
<p>नयाँ दिल्ली। खुला ठाउँमा शौच गरेको भन्दै भारतमा दुई दलित बालबालिकाको हत्या भएको छ। </p>
<p>भारतको मध्यप्रदेशस्थित शिवपुरी जिल्लाको भावडखेडी गाउँको सडक नजिकै खुला स्थानमा दिसा-पिसाब गरिरहेको अवस्थामा ती बालबालिकामाथि लौरोले हानेर आक्रमण भएको प्रहरीको भनाइ छ।</p>
<p>आक्रमणमा पर्नेमा वाल्मीकि समाजका १२ वर्षीया रोशनी र १० वर्षका अविनाश नामका बालबालिका रहेका छन्।</p>
<p>बालबालिकाको हत्या भएको केही समयमै प्रहरीले रामेश्‍वर यादव र हाकिम यादव नामका उपल्लो जातका दुई व्यक्तिलाई पक्राउ गरेको छ। </p>
<p>बीबीसीका अनुसार पीडितका पारिवारले घरमा शौचालय नभएकाले उनीहरूले खुला स्थानमा दिसा-पिसाब गरेको बताएका छन्।</p>
<p>लाखौँ गरिब भारतीयहरूले खुला स्थानमा दिसा-पिसाब गर्ने गर्छन्। त्यसले विशेषगरी महिला र बालबालिकालाई जोखिममा पार्ने गरेको छ।</p>
प्रतिक्रिया दिनुहोस्
.jpg)
