Others

गृहपृष्ठ

नयाँ वर्षको पहिलो दिन नेपालमा पन्ध्र सय शिशु जन्मँदै काठमाडौं। अङ्ग्रेजी नयाँ वर्षको पहिलो दिनमा आज नेपालभर एक हजार ५६७ शिशु जन्मिने अनुमान गरिएको छ ।   नेपाली नयाँ शिशुहरुको हिस्सा संसारभर नयाँ वर्षको दिनमा जन्मिने अनुमानित ३,९२,०७८ शिशुको तुलनामा ०.४ प्रतिशत हुनेछ । संयुक्त राष्ट्रसङ्घीय बालकोष (युनिसेफ) नेपालले यस्तो अनुमानित आँकडा प्रक्षेपण गरेको हो।  नयाँ वर्ष र नयाँ दशकको शुरुआतमा आफ्नो भविष्यका लागि सोच्ने मात्र नभई पछि आउनेहरूको भविष्यका लागि पनि सोच्ने अवसर रहेको युनिसेफकी कार्यकारी निर्देशक हेनरिएटा फोरले बताएकी छन्। “पात्रोमा जनवरी फर्किदैं गर्दा हामीलाई जीवनको यात्रा शुरू गरेका हरेक बालबालिकाको उनीहरूलाई दिने अवसर र त्यसले दिने भविष्यको सम्भावनालाई सम्झाउँछ”, फोरले भनिन्। प्रशान्त क्षेत्रको फिजीले सन् २०२० को पहिलो शिशु प्राप्त गरेको छ भने संयुक्त राज्य अमेरिकाले नयाँ वर्षको दिनको अन्तिम शिशु प्राप्त गर्नेछ।  संसारभर, आज जन्मिने आधाभन्दा धेरै शिशु बढी सङ्ख्याका आधारमा क्रमशः भारत, चीन, नाइजेरिया, पाकिस्तान, इण्डोनेशिया, संयुक्तराज्य अमेरिकालगायत छन् ।  संसारभरका लाखौं नवजात शिशुका लागि, उनीहरुको जन्म सुखद हुन नसकेको आँकडा प्रस्तुत गर्दै युनिसेफले सन् २०१८ मा संसारभरका २५ लाख नवजात शिशु उनीहरु जन्मेको पहिलो महिनामै र तीमध्ये करीब एक तिहाइ उनीहरुको जीवनको पहिलो दिनमै मरेको जनाएको छ ।  ती शिशुमध्ये धेरैजसो समय अगाडि नै जन्मिने, सुत्केरी हुँदाको जटिलता र सेप्सिसजस्ता सङ्क्रमणलगायत जोगाउन सकिने कारणबाटै मरेका थिए। हरेक वर्ष विश्वमा २५ लाखभन्दा धेरै शिशु मृत जन्मिन्छन्।  सन् २०१८ मा जन्मेको पहिलो महीनामा मर्ने शिशुको हिस्सा पाँच वर्षमुनि मर्ने बालबालिकाको कूल संख्याको ४७ प्रतिशत थियो । रासस