धमाधम बन्दै कोशी करिडोर प्रसारणलाइन
<p>खाँदबारी। संखुवासभाका स्थानीय खोलाबाट उत्पादन भएको विद्युत्लाई एकै ठाउँमा संकलन गर्ने उद्देश्यले निर्माण थालिएको २२० केभी क्षमताको कोशी करिडोरअन्तर्गतका विद्युत् प्रसारणलाइनको काम धमाधम भइरहेको छ। </p>
<p>सुनसरीको इनरुवादेखि संखुवासभाको खाँदबारी नगरपालिका–९ तुम्लिङटारसम्मको १०५ किलोमिटरको सो काममा विद्युत प्राधिकरणको लगानी छ। </p>
<p>कोशी करिडोर प्रसारणलाइन प्रदेश १ को संखुवासभा, भोजपुर, तेह्रथुम र ताप्लेजुङ जिल्लामा निर्माण भइरहेको छ।</p>
<p>इनरुवादेखि तुम्लिङटारसम्म ३२१ वटा टावर निर्माण भइरहेको कोशी करिडोरका सहायक प्रबन्धक भूपेश श्रेष्ठले जानकारी दिए। </p>
<p>श्रेष्ठका अनुसार त्यसमध्ये संखुवासभाको दक्षिणी सिमाना टुटे देउरालीदेखि तुम्लिङटारसम्मको २९ दशमलव पाँच किमि लम्बाइमा ९७ वटा टावर निर्माणको ६० प्रतिशत काम सकिएको छ।</p>
<p>९७ वटा टावरमध्ये अहिलेसम्म ५४ टावर निर्माण सकिएका छन्। २७ टावरको जग खनिएको छ।</p>
<p>बाँकी १६ टावर निर्माणको काम चाँडै थालिने र चैनपुरको बानेश्वर र तुम्लिङटारमा सवस्टेसनको काम भइरहेको छ। </p>
<p>संखुवासभाको माया खोला, हेवा खोला र इखुवा खोलालगायत स्थानीय खोलानालाबाट उत्पादन भएको विद्युत्लाई एकै ठाउँमा संकलन गरी केन्द्रीय प्रसारणलाइनमा जोड्ने उद्देश्यले कोशी करिडोर प्रसारण लाइन बनाइएको हो । </p>
<p>विद्युत् प्राधिकरणले निजी क्षेत्रका २८ आयोजनाको ५१६ मेगावाट विद्युत् यही प्रसारणलाइनमा जोड्ने गरी विद्युत् खरीद सम्झौता (पिपिए) गरिसकेको छ । </p>
प्रतिक्रिया दिनुहोस्
.jpg)
