विद्युत चुहावट नियन्त्रणबाट प्राधिकरणको वार्षिक सात अर्ब थप आम्दानी
<p>काठमाडौं। विद्युत प्राधिकरणले तीन वर्षमा १० दशमलब ४६ प्रतिशत विद्युत चुहावट नियन्त्रणबाट मात्र वार्षिक करीब सात अर्ब रुपैयाँ थप आम्दानी गरेको छ।</p>
<p>विद्युत् चुहावट नियन्त्रण, विद्युतीकरण र सेवा प्रवाह सुधार गर्न नेपाल विद्युत प्राधिकरणका वितरण तथा ग्राहक सेवातर्फका १३८ कार्यालय प्रमुखहरुले व्यवस्थापनसँग कार्यसम्पादन सम्झौता गरिसकेका छन्।</p>
<p>प्राधिकरणले आव २०७६/७७ मा वितरणतर्फको विद्युत चुहावट आठ दशमलब ५० प्रतिशतमा झार्ने लक्ष्य राखेको छ। </p>
<p>गत आर्थिक वर्षमा वितरणतर्फको ११ दशमलब २८ प्रतिशतको चुहावटलाई दुई दशमलब ७८ प्रतिशत विन्दुले घटाएर आठ दशमलब ५० प्रतिशतमा झार्ने लक्ष्य तय गरिएको हो।</p>
<p>तीन वर्षअघिसम्म विद्युत् चुहावट २५ दशमलब ७८ प्रतिशत रहेकोमा गत आवसम्ममा १५ दशमलब ३२ प्रतिशतमा झारिएको छ। </p>
<p>चालू आर्थिक वर्ष २०७६/७७का लागि प्राधिकरणका सात प्रादेशिक तथा दुई प्रदेश डिभिजन कार्यालय प्रमुखहरु र मातहतका १२९ वितरण केन्द्र प्रमुखहरुसँग कार्यसम्पादन सम्झौता गरिएको छ।</p>
<p>प्राधिकरण व्यवस्थापनसँग १९ पुसमा प्रदेश ५ को प्रादेशिक कार्यालय बुटवलका प्रमुख र मातहतका वितरण केन्द्र प्रमुखहरुले सम्झौता गरेसँगै यस आर्थिक वर्षका लागि वितरण तथा ग्राहक सेवातर्फको कार्यसम्पादन सम्झौता सकिएको छ।</p>
<p>प्राधिकरणका कार्यकारी निर्देशक कुलमान घिसिङसँग प्रादेशिक तथा प्रदेश डिभिजन कार्यालय प्रमुखहरुले र वितरण तथा ग्राहक सेवा निर्देशनालयका उपकार्यकारी निर्देशक हरराज न्यौपानेसँग वितरण केन्द्र प्रमुखहरुले कार्यसम्पादन सम्झौता गरेका हुन्। </p>
<p>कार्यसम्पादन सम्झौता मार्गनिर्देशक निर्देशिका भएकाले ग्राहकलाई दिने सेवामा सुधार र कार्यालयभित्रको कार्यसम्पादनमा चुस्तता आई समग्ररुपमा संस्थाको प्रशासनिक तथा वित्तीय अवस्थामा सकारात्मक प्रभाव पर्ने प्राधिकरण कार्यकारी निर्देशक घिसिङले बताए। </p>
प्रतिक्रिया दिनुहोस्
.jpg)
