सभामुख चयनः पूर्वएमालेसँग नझुक्न दाहाललाई दबाब
<p>काठमाडौं। नेपाल कम्युनिष्ट पार्टी (नेकपा) का कार्यकारी अध्यक्ष पुष्पकमल दाहाललाई तत्कालीन माओवादी समूहले सभामुख पद नछाड्न चर्को दबाब दिएका छन्। </p>
<p>पूर्वमाओवादी समूहका नेताहरूले दाहाल निवास खुमलटारमै पुगेर दबाब दिएका हुन्। </p>
<p>दाहालले आफ्नै समूहबाट आएको दबाब थेग्न नसकेर नेकपाका अर्का अध्यक्ष प्रधानमन्त्री केपी शर्मा ओलीसँग सभामुखको विषय टुंगो लगाउन नसकेको आजको नागरिक दैनिकले समाचार लेखेको छ। </p>
<p>दाहाल निवासमा पूर्वमाओवादी समूहले निरन्तर छलफल गरिरहेका छन्। </p>
<p>दाहाल निवासमा सभामुखका विषयमा छलफल भएको स्थायी कमिटी सदस्य देवेन्द्र पौडेलले स्वीकार गरेका छन्।</p>
<p>“हामीले दुवै पृष्ठभूमिबाट आएका साथीहरूलाई मिलाएर लैजान अध्यक्षलाई सुझाव दिएका छौं। सभामुखको विषय टुंगिएको छैन”, पौडेलले भने। </p>
<p>सभामुख चयनको विषयलाई लिएर नेकपाभित्र पूर्वएमाले र पूर्वमाओवादी खेमाबीच होडबाजी नै चलेको छ। </p>
<p>एक वर्षपछि स्थायी कमिटी बैठक चलिरहँदा नेकपाका कार्यकारी अध्यक्ष दाहाल निवासमा सोही विषयमा छलफल भएको थियो।</p>
<p>दाहालले सभामुख कार्यकारी अध्यक्ष पदसँग साटेको हल्लापछि पूर्वमाओवादी नेताहरूले उनलाई निरन्तर खबरदारी गरिरहेको स्रोतलाई उद्धृत गर्दै समाचारमा जनाइएको छ। </p>
<p>सभामुखमा पूर्वमाओवादीतर्फबाट अग्नि सापकोटा र पूर्व एमालेतर्फबाट सुवास नेम्बाङको नाम चर्चामा छ। </p>
प्रतिक्रिया दिनुहोस्
.jpg)
