देउवालाई दबाब दिन जिल्ला सभापतिको भेला गर्दै पौडेल समूह
<p>काठमाडौं। संस्थापन पक्षले एक पक्षीय ढंगले महाधिवेशन कार्यतालिका ल्याएको भन्दै असन्तुष्‍ट बनेका वरिष्ठ नेता रामचन्द्र पौडेल पक्षका जिल्ला सभापतिहरुको भेला आज हुँदैछ।</p>
<p>सभापति शेरबहादुर देउवालाई दबाब दिन आज बिहान ११ बजे पार्टी केन्द्रीय कार्यालय सानेपामा पौडेल समूहको भेला बोलाइएको हो।</p>
<p>संस्थापन पक्षले असन्तुष्ट पक्षको सहभागिताबिनै १४औं महाधिवेशन कार्यतालिकासहित विभिन्न निर्णय गरेपछि विवाद झन् बल्झिएको छ।</p>
<p>संस्थापन पक्षले निर्णय नसच्याएसम्म छलफलमै नबस्ने अडानमा असन्तुष्ट समूह छ।</p>
<p>सभापति देउवाले कार्यसमिति बैठकबाट महाधिवेशनको कार्यतालिका तोक्ने, विधानका दफा निलम्बन गर्ने, विभागहरुको संख्या थप्‍नेलगायतका निर्णय गरेपछि पौडेल र सिटौला पक्षले विरोध गरिरहेका छन्।</p>
<p>कांग्रेस संखुवासभाका सभापति दिपन श्रेष्‍ठले विधानअनुसार एकताबद्ध भएर पार्टी चलाउन दवाब दिन आफूहरु काठमाडौं आएको बताएका छन्।</p>
<p>"रामचन्द्र दाइले सल्लाह गर्नलाई भेला हुनुपर्‍यो भनेर बोलाउनुभयो, सभापतिज्यूको एकलौटी व्यवहार अन्त्यका लागि दबाब त दिनैपर्‍यो", श्रेष्ठले <em>देखापढी</em>सँग भने।</p>
<p>कांग्रेसलाई अप्ठ्यारो परेको अहिलेको समयमा लोकतन्त्रको रक्षाको लागि एकढिक्का भएर अघि बढ्न आफूहरुको एकसूत्रीय सुझाव हुने उनले बताए।</p>
<p>आजको भेलामा अर्का नेता कृष्ण सिटौला समूह पनि सहभागी हुनसक्ने सिटौलानिकटका एक नेताले बताएका छन्। <br />
</p>
प्रतिक्रिया दिनुहोस्
.jpg)
