राप्रपाले पृथ्वीजयन्ती तीन दिनसम्म मनाउने
<p>काठमाडौं। राष्ट्रिय प्रजातन्त्र पार्टीले पृथ्वीजयन्ती तथा राष्ट्रिय एकता दिवस २६-२८ पुसको तीन दिनसम्म उत्सवका रूपमा मनाउने भएको छ।</p>
<p>देशभरका सबै जिल्ला कार्यसमितिलाई पृथ्वीनारायण शाहको योगदान एवं नेपालको एकीकरणको अभियानप्रति श्रद्धा, सम्मानलगायत अन्य विविध कार्यक्रम आयोजना गर्न राप्रपाले निर्देशन दिएको छ।</p>
<p>२७ पुसमा राप्रपाले शुभकामना तथा चियापान आयोजना गर्नेछ।</p>
<p>चियापान तथा शुभकामना कार्यक्रममा सहभागिताका लागि १० हजार निमन्त्रणा कार्ड वितरण गरिने राप्रपाका नेता देवेन्द्र प्रधानले बताए।</p>
<p>राष्ट्र निर्माता शाहको दूरदर्शिता र साहसिक नेतृत्वमा नेपाली जनताको साझा प्रयासबाट वर्तमान नेपालको निर्माण र एकीकरण सम्भव भएकाले हामीले आफूलाई नेपाली हौँ भन्ने पहिचान र गौरव प्राप्त गर्न पाएको हुँदा दिवस मनाउन लागिएको प्रधानले बताए।</p>
<p>राप्रपाले २७ पुसमा सार्वजनिक बिदाको समेत माग गरेको छ । <em>रासस</em></p>
प्रतिक्रिया दिनुहोस्
.jpg)
