गौतम निवासमा ओलीइतरका नेताहरूको जमघट
<p>काठमाडौं। नेकपाका प्रस्तावित उपाध्यक्ष वामदेव गौतम निवासमा अध्यक्ष एवं प्रधानमन्त्री केपी शर्मा ओली इतरका नेताहरूको ‘गोप्य’ जमघट भएको छ।</p>
<p>नेकपाभित्र अध्यक्षद्वय केपी ओली र पुष्पकमल दाहालबीच सभामुख चयनमा सहमति जुट्न सकस भइरहेका बेला भएको यो बैठकलाई अर्थपूर्ण मानिएको आजको अन्नपूर्ण पोष्टले समाचार लेखेको छ।</p>
<p>भैसेपाटीस्थित गौतम निवासमा भएको जमघटमा अध्यक्ष दाहाल, वरिष्ठ नेताद्वय झलनाथ खनाल र माधव नेपाल, प्रवक्ता नारायणकाजी श्रेष्ठ र स्थायी समिति सदस्य भीम रावल सहभागी थिए।</p>
<p>नेताहरूले अध्यक्ष एवं प्रधानमन्त्री ओलीसँग परामर्श गरेरै उक्त बैठक राखेको जिकिर गरेका छन्।</p>
<p>तर, २३ पुस साँझ दुई घण्टा भएको छलफलमा ओली र उनी पक्षधर भनी चिनिएका नेताहरू ईश्वर पोखरेल र महासचिव विष्णु पौडेल गएनन्।</p>
<p>सचिवालय सदस्य गृहमन्त्री रामबहादुर थापा चीन भ्रमणमा छन्।</p>
<p>छलफल सभामुख चयन र एमसीसीमा केन्द्रित भएको स्रोतले जनायो।</p>
<p>यसअघि १० माघ २०७५ मा प्रधानमन्त्री ओली विदेश भ्रमणमा रहँदा बहुमत सचिवालय सदस्यले झम्सिखेलमा यस्तै छलफल गरेका थिए।</p>
<p>वरिष्ठ नेता खनालले पार्टीभित्रको आन्तरिक विषयमा सामान्य छलफल भएको प्रतिक्रिया दिए।</p>
<p>“पार्टीभित्रका आन्तरिक समस्याका विषयमा सामान्य छलफल भएको हो। सभामुख चयनलगायत विषयमा छलफल भएको होइन”, उनले भने।</p>
प्रतिक्रिया दिनुहोस्
.jpg)
