काममा आलटाल गर्ने ठेकेदारलाई कारबाही गर्छौं: मन्त्री नेम्वाङ
<p>फिदिम। भौतिक पूर्वाधार तथा यातायातमन्त्री वसन्तकुमार नेम्वाङले काममा आलटाल गर्ने ठेकेदारलाई कारबाही गर्ने बताएका छन्।</p>
<p>"संशोधित सार्वजनिक खरीद नियमावलीअनुसार काम नगरे निर्माण व्यवसायीलाई कारबाही गर्छौं", मन्त्री नेम्वाङले फिदिममा पत्रकारसँग भने, “ठेकेदारहरू सुध्रिने मौका दिनेगरी सरकारले नियमावलीको संशोधन गरेको हो।”</p>
<p>रुग्ण आयोजनाहरूको छिटो निर्माण सम्पन्न गर्ने कामलाई सरकारले उच्च प्राथमिकता राखेको मन्त्री नेम्वाङको भनाइ छ।</p>
<p>ठूला पूर्वाधारका आयोजना निर्माण गर्न निर्माण कम्पनी र सरकारी निकायलाई उत्तिकै जिम्मेवार बनाइने उल्लेख गर्दै मन्त्री नेम्वाङले भने,“समयमा बजेट निकासा नहुने, स्थानीयस्तरमा अवरोध हुनेजस्ता समस्या समाधान गर्न मन्त्रालयको विशेष ध्यान दिएको छ।”</p>
<p>पुष्पलाल (मध्यपहाडी) लोकमार्गलगायत पूर्वी पहाडका विकास आयोजनाको स्थलगत अनुगमन गर्न मन्त्री नेम्वाङ फिदिम आएका हुन्। <em>रासस</em></p>
प्रतिक्रिया दिनुहोस्
.jpg)
