''नेपालको शान्तिप्रक्रिया अभ्यास द्वन्द्वरत् देशका लागि सिकाइ''- परराष्ट्रमन्त्री ज्ञवाली
<p>काठमाडौं। परराष्‍ट्रमन्त्री प्रदीपकुमार ज्ञवालीले नेपालको शान्ति प्रक्रिया र सफल लोकतान्त्रिक रुपान्तरणको अनुभव द्वन्द्वमा रहेका देशका लागि उपयोगी हुनसक्ने बताएका छन्। </p>
<p>संयुक्त राष्ट्रसंघको ७४ औँ महासभा बैठकलाई आज विहान सम्बोधन गर्दै मन्त्री ज्ञवालीले शान्ति प्रक्रियाको अनुभव आदानप्रदान गर्न पाउनु नेपालको लागि हर्षको विषय भएको बताए।</p>
<p>ऐतिहासिक राजनीतिक रुपान्तरणलाई टेकेर नेपाल सरकार अहिले उक्त राजनीतिक उपलब्धिलाई दीगोपना प्रदान गर्दै आर्थिक विकासको कार्यसूचीमा आफूलाई केन्द्रित गरेको उनको भनाइ छ। </p>
<p>मन्त्री ज्ञवालीले भने, “हामी समृद्ध नेपाल, सुखी नेपालीको अति महत्वपूर्ण राष्ट्रिय आकाङ्क्षा पूरा गर्ने दिशामा छौँ ।” नेपालले मूलभूत रुपमा नीतिगत, प्रक्रियागत एवं कानूनी सुधार गरेर लगानीमैत्री वातावरण निर्माण गरेको र सबै क्षेत्रमा शतप्रतिशत वैदेशिक लगानीका लागि एकद्वार प्रणालीलाई सञ्चालनमा ल्याएको मन्त्री ज्ञवालीले बताएका छन्।</p>
<p>महासभा बैठकमा उनले चाँडोभन्दा चाँडो अल्पविकसित अवस्थाबाट नेपालको स्तरोन्नती गर्न तथा सन् २०३० अघि नै दीगो विकासका लक्ष्य हासिल गर्दै मध्यम आययुक्त देशमा रुपान्तरण हुने आकांक्षालाई साकार पार्न नेपाल सरकार लागि परेको उल्लेख गरेका छन्।</p>
<p>संगठित अन्तर्राष्ट्रिय अपराध, मानव तथा लागुऔषधको तस्करी, राष्ट्रिय सिमानाभित्र आतङ्कवादको फैलावटजस्ता समस्या तथा आपराधिक गतिविधीका निम्ति लगानी, गैरकानूनी रुपमा प्रवाह हुने रुपैयाँ पैसाविरुद्ध सबै सदस्य देश एकजुट भएर कठोर कदम चाल्नुपर्नेमा परराष्‍ट्रमन्त्री ज्ञवालीको जोड छ।</p>
<p>“आतङ्कवादका सबै रुपको नेपाल निन्दा गर्छ, हामी राष्ट्रसंघीय प्रतिआतङ्कवाद रणनीतिसहित मौजुदा सन्धिसम्झौताको प्रभावकारी कार्यान्वयनको पक्षमा छौँ”, ज्ञवालीले भनेका छन्। <em>रासस</em><br />
</p>
प्रतिक्रिया दिनुहोस्
.jpg)
