नेकपामा संविधान संशोधन बहस, सभामुखबारे उल्झन बढेपछि बेग्लै मोर्चाबन्दी
<p>काठमाडौं। सत्तारुढ नेपाल कम्युनिष्ट पार्टी (नेकपा) को शीर्ष तहमा संविधान संशोधनका विषयमा बहस शुरू भएको छ।</p>
<p>केकपा अध्यक्षद्वय प्रधानमन्त्री केपी शर्मा ओली र पुष्पकमल दाहालले आफूलाई राष्ट्रिय सभामा जान प्रस्ताव गरेपछि नेता वामदेव गौतमले संविधान संशोधन गर्नुपर्ने सर्त राखेका थिए।</p>
<p>उनी प्रतिनिधि सभा चुनावमा बर्दिया क्षेत्र नम्बर १ बाट पराजित भएका थिए।</p>
<p>संविधानको धारा ७६ (१) मा राष्ट्रपतिले प्रतिनिधिसभामा बहुमत प्राप्त संसदीय दलका नेतालाई प्रधानमन्त्रीमा नियुक्त गर्ने र निजको अध्यक्षतामा मन्त्रिपरिषद् गठन हुने उल्लेख छ।</p>
<p>यो धाराअनुसार राष्ट्रिय सभा सदस्य प्रधानमन्त्री बन्न पाउने छैनन्।</p>
<p>तर, नेता गौतमले यसलाई संशोधन गरेर राष्ट्रियसभा सदस्य पनि प्रधानमन्त्री बन्न पाउनुपर्ने गरी संविधान संशोधन गर्नुपर्ने प्रस्ताव गर्दै आएका छन्।</p>
<p>नेता गौतमकै निवास भैंसेपाटीमा २३ पुसमा भएको छलफलमा सहभागी प्रधानमन्त्री ओलीइतरका नेताले गौतमले उठाउँदै आएको विषयमा पुनः प्रधानमन्त्रीसँग नीतिगत छलफल गर्ने समझदारी बनाएको एक नेतालाई उद्धृत गर्दै आजको <em>अन्नपूर्ण पोष्ट</em>मा समाचार छापिएको छ।</p>
<p>आजको <em>कान्तिपुर</em> दैनिकले सभामुख चयनबारे उल्झन बढेपछि ओलीइतरका नेताहरूले मोर्चाबन्दी शुरू गरेको समाचार लेखेको छ।</p>
<p>नेकपाका अध्यक्ष पुष्पकमल दाहालकै नेतृत्वमा छलफल र परामर्श तीब्र पारिएको हो।</p>
<p>त्यसको पछिल्लो संस्करण हो- नेकपाका प्रस्तावित उपाध्यक्ष वामदेव गौतमको निवास भैसेपाटीमा भएको छलफल।</p>
<p>“सभामुख पार्टी एकताको समीकरणमा असर नपर्ने गरी छान्नुपर्छ भन्ने विषयमा एकमत छौं”, छलफलमा सहभागी एक नेताले भने, “त्यसो हुँदा प्रधानमन्त्रीजीले आफ्नो अडान छाड्नुपर्छ।”</p>
<p>बैठकमा गौतमबाहेक अरु नेताले सभामुख पूर्वमाओवादी पक्षबाटै हुनुपर्ने दाहालको कुरामा समर्थन जनाएको <em>कान्तिपुर</em>मा लेखिएको छ।</p>
प्रतिक्रिया दिनुहोस्
.jpg)
