राष्ट्रिय सभा सदस्य उम्मेदवारको अन्तिम नामावली आज
<p>काठमाडौं। आउँदो ९ माघमा हुने राष्ट्रिय सभा सदस्य निर्वाचनको उम्मेदवारको अन्तिम नामावली आज प्रकाशन हुँदैछ।</p>
<p>२४ पुसमा १० देखि चार बजेसम्म मनोनयन फिर्ता गर्न तोकिएको समयमा कुनै पनि उम्मेदवारले आफ्नो नाम फिर्ता नलिएको निर्वाचन आयोगका प्रवक्ता राजकुमार श्रेष्ठले बताए। </p>
<p>आज बिहान १० बजे देखि दिउँसो १ बजेसम्म उम्मेदवारको अन्तिम नामावली प्रकाशन गरिने कार्यतालिका छ।</p>
<p>दिनको एक बजेदेखि अपरान्ह चार बजेसम्म उम्मेदवारलाई निर्वाचन चिन्ह प्रदान गरिने आयोगले जनाएको छ।</p>
<p>राष्ट्रिय सभाका सदस्यको पहिलोपटक एकतिहाइ सदस्यको पदावधि दुई वर्ष, अर्को एकतिहाइको चार वर्ष र बाँकी एकतिहाइको छ वर्षमा पदावधि समाप्त हुने संवैधानिक व्यवस्था छ। </p>
<p>दुईवर्षे कार्यकाल पूरा गर्ने सदस्यको खाली पदका लागि यो निर्वाचन हुन लागेको हो । </p>
<p>राष्ट्रिय सभाको सदस्यको पदावधि सकिनुभन्दा ३५ दिनअगाडि नै निर्वाचन गरिसक्नुपर्ने कानूनी व्यवस्था छ। </p>
<p>२० फागुनमा दुईवर्षे कार्यकाल पूरा गर्ने नेपाल कम्युनिष्ट पार्टी (नेकपा) का नौ, नेपाली कांग्रेसका सात, राजपाका दुई र समाजवादी पार्टीका एक जना सदस्य छन्। </p>
<p>स्थायी सदनका रूपमा रहेको राष्ट्रिय सभामा ५९ सदस्य हुन्छन् ।</p>
<p> </p>
प्रतिक्रिया दिनुहोस्
.jpg)
