Others

गृहपृष्ठ

१४ फागुनमा स्ववियु निर्वाचन गर्ने त्रिविको निर्णय काठमाडौं। त्रिभुवन विश्वविद्यालयल (त्रिवि)ले आगामी १४ फागुनमा स्वतन्त्र विद्यार्थी युनियन (स्ववियु) निर्वाचनको गर्ने निर्णय गरेको छ।      त्रिवि कार्यकारी परिषद्को  २३ पुसमा बसेको बैठकले १४ फागुनमा स्ववियु निर्वाचन गर्ने निर्णय गरेको विद्यार्थी कल्याण महाशाखा प्रमुख गङ्गाबहादुर थापाले जानकारी दिए।      परिषद्ले महाशाखा प्रमुख थापालाई त्रिवि अन्तर्गतका क्याम्पसमा स्ववियु निर्वाचनको तयारी गर्न निर्देशन दिइसकेको छ। “मलाई आज मात्र १४ फागुनमा निर्वाचन गर्न आवश्यक तयारीको लागि पत्र प्राप्त भएको छ’’, उनले भने, “अब हामी स्ववियु निर्वाचनको तयारीमा जुट्छौं।’’ उनले २८ पुसमा त्रिविका ६२ आङ्गिक क्याम्पसलाई पत्र लेख्दै निर्वाचनको तयारी गर्न निर्देशन दिने बताए।      त्रिविका आङ्गिक र सम्बन्धन प्राप्त करीब एक हजार ५१ क्याम्पसमा स्ववियु निर्वाचन हुनेछ। महाशाखा प्रमुख थापाले सबै विद्यार्थीसँग छलफल गरेर निर्वाचनको तालिका सार्वजनिक गर्ने बताए।      प्रत्येक दुई–दुई वर्षमा हुने स्ववियु निर्वाचन २०६५ सालयता त्रिविका सबै क्याम्पसमा हुनसकेको छैन। विद्यार्थी सङ्गठनबीच उमेर हदबन्दी र निर्वाचन प्रणालीबीच सहमति हुन नसक्दा धेरै क्याम्पसमा निर्वाचन हुन नसकेको हो। २०७३ मा करीब २५० क्याम्पसमा स्ववियु निर्वाचन भएको थियो। त्यतिबेला उपत्यकाभित्रका आरआर, शिक्षा, सानोठिमी, भक्तपुर बहुमुखी, पिपल्स, जनप्रशासन, पुल्चोक इञ्जिनीयरीङ, थापाथली इञ्जिनीयरिङ, महाराजगञ्ज शिक्षण अस्पताललगायतका क्याम्पसमा भने निर्वाचन भएको थियो।      २०७३ भएको स्ववियु निर्वाचनको १४ फागुन २०७५ मा नै कार्यकाल सकिएपनि त्रिविले एकवर्ष समयावधि थप गरेको थियो। त्यसअघि त्रिविले तीन पटक स्ववियु निर्वाचन घोषणा गरेपनि हुनसकेको थिएन। त्रिविको विनियमावलीमा संशोधन गरेर २०६९ सालमा २८ वर्षे उमेर हदबन्दी र मिश्रित निर्वाचन प्रणालीमा स्ववियु निर्वाचन गर्ने व्यवस्था गरेको थियो।      शुरूमा नेपाल विद्यार्थी सङ्घले उमेर हदबन्दीको विरोध गरेको थियो। पछि एक कार्यकाल उमेर हदबन्दी नलगाउने र मिश्रित निर्वाचन प्रणालीमा जानेमा सबै सङ्गठन सहमत भएका थिए। २०६९ सालमा स्ववियु निर्वाचनको हुन लाग्दा अन्तिम समयमा आएर स्थगित भएको थियो।      अहिले अध्यक्ष, सचिव र कोषाध्यक्ष तथा ५० प्रतिशत सदस्य प्रत्यक्ष निर्वाचन र उपाध्यक्ष, सहसचिव र ५० प्रतिशत सदस्य समानुपातिक निर्वाचन गरी मिश्रित निर्वाचन प्रणाली अवलम्बन गर्ने व्यवस्था गरिएको छ। अनेरास्ववियूका संयोजक ऐन महरले आफूहरू पहिल्यैदेखि नै स्ववियु निर्वाचनको पक्षमा रहेको बताए। उनले २८ पुसमा बस्ने केन्द्रीय कमिटी बैठकबाट निर्वाचनको तयारीमा लाग्न सबै क्याम्पस एकाइ कमिटीलाई निर्देशन दिने बताए। नेपाल विद्यार्थी सङ्घ (नेविसङ्घ)का निवर्तमान अध्यक्ष नैनसिंह महरले आफूहरू स्ववियु निर्वाचनमा सहभागी हुने बताए। “स्ववियु हामीले जन्माएको हुनाले हामी निर्वाचनमा सहभागी हुन्छौ’’, उनले भने, “निर्वाचन नभाँडेर स्वच्छ, निष्पक्ष गराउनुपर्ने छ।’’ रासस