बालुवाटार पुगेर उपसभामुख तुम्बाहाङफेले भनिन्- 'राजीनामा दिन्न'
<p>काठमाडौं। उपसभामुख शिवमाया तुम्बाहाङफेले नेकपाका शीर्ष नेताहरुसँग राजीनामा नदिने अडान दोहोर्‍याएकी छन्।</p>
<p>केहीबेरअघि प्रधानमन्त्री निवास बालुवाटार पुगेकी तुम्बाहाङफेले पार्टीले निर्णय गर्दैमा आफूले राजीनामा नगर्ने अडान प्रष्टसँग राखिन्।</p>
<p>२६ पुसमा नेकपा सचिवालयको बैठकले उनलाई उपसभामुखबाट राजीनामा दिएर सभामुख निर्वाचनको बाटो खुलाउन आग्रह गरेको थियो।</p>
<p>त्यो आग्रहलाई अस्वीकार गरेकी उपसभामुख तुम्बाहाम्फे नेकपा नेताहरुको बोलावटपछि प्रधानमन्त्री निवास बालुवाटार पुगेकी थिइन्।</p>
<p>नेकपा अध्यक्ष प्रधानमन्त्री केपी शर्मा ओली र अर्का अध्यक्ष पुष्पकमल दाहाल साथै महासचिव विष्णु पौडेल र रक्षामन्त्री ईश्वर पोखरेल लगायतका नेताहरु भेला भएर उपसभामुख तुम्बाहाङफेलाई बोलाएका थिए।</p>
<p>"दुई जना अध्यक्षहरू र नेताहरूले सम्झाउने काम गर्नुभयो, उपसभामुखज्यूले सभामुखका लागि आफ्नो योग्यता पेश गर्दै आफ्नो दाबी छाड्नुभएन", बालुवाटार स्रोतले देखापढीसँग भन्यो, "उहाँ अहिले निस्किसक्नुभयो।"</p>
<p>प्रतिनिधि सभाको बैठक अहिले दिउँसो १ बजेलाई डाकिएको छ। सभामुख निर्वाचनको कार्यसूची तय गरेको यसअघिका दुईवटा बैठक नयाँ सभामुखबारे टुंगो नलागेपछि निरन्तर सूचना टाँसेर स्थगित हुँदै आएको छ।</p>
<p>"राजीनामाबारे पार्टीको निर्देशन मान्न उहाँलाई मनाउने क्रम चलिरहेको छ, सम्भवत: आजको बैठक भने स्थगित हुन्छ", स्रोतले भन्यो।</p>
<p> </p>
प्रतिक्रिया दिनुहोस्
.jpg)
