बूढानीलकण्ठमा देउवा, पौडेल र सिटौलाबीच डेढ घण्टा बैठक, असमझदारी हटाउने सहमति
<p>काठमाडौं। नेपाली कांग्रेसका सभापति शेरबहादुर देउवाले आफ्नै निवास बूढानीलकण्ठमा बोलाएर असन्तुष्ट नेताहरू रामचन्द्र पौडेल र कृष्णप्रसाद सिटौलासँग छलफल गरेका छन्।</p>
<p>महामन्त्री पूर्णबहादुर खड्कासमेत सहभागी बैठकले पार्टीमा पछिल्लो समय देखिएका असमझदारी हटाएर अगाडि बढ्ने सहमति गरेको कांग्रेस नेता रमेश लेखकले <em>देखापढी</em>लाई बताए। </p>
<p>आफूहरूले बहिष्कार गरेको केन्द्रीय कार्यसमिति बैठकबाट पार्टीको महाधिवेशन एक वर्ष पछि सार्ने निर्णय गरिएपछि नेताद्वय पौडेल र सिटौलाको समूह सभापति देउवासँग असन्तुष्ट बनेका थिए।</p>
<p>संस्थापन पक्षसँग असन्तुष्ट समूहले जिल्ला सभापतिहरूको छुट्टै भेला गरेर केन्द्रीय कार्यसमितिको निर्णय सच्याउन मागसमेत गरेका थिए।</p>
<p>पछिल्लो समय पार्टीभित्रको असन्तुष्टि बढ्दै गएपछि सभापति देउवाले असन्तुष्ट दुवै नेतालाई आज साँझ छलफलका लागि आफ्नै निवासमा डाकेका थिए।</p>
<p>साँझ साढे ६ देखि ८ बजेसम्म देउवा निवासमा बसेको बैठकले मिलेर जाने समझदारी गरेको हो। </p>
<p>नेता पौडेल भोलि भारतको राजधानी नयाँ दिल्ली जाँदैछन्। उनी त्यसतर्फ लाग्नुअघि नै सहमति जुटाउने उद्देश्यसहित देउवाले बैठक बोलाएका थिए। </p>
प्रतिक्रिया दिनुहोस्
.jpg)
